आचारसंहिता उलङ्घन गर्दै जनप्रतिनिधि

  ०७९ कात्तिक १६ गते

निर्वाचन आचारसंहिता अनुसार स्थानीय तहका जनप्रतिनिधिहरूले आफ्नो स्थानीय तहभित्र कुनै पनि दलका उम्मेदवारको पक्षमा मत माग्न र मत माग्ने कार्यक्रम लगायत चुनावी सभा समारोहमा समेत हिड्न प्रतिबन्ध लगाए पनि जिल्लामा भने केही जनप्रतिनिधिहरूले आचारसंहिता विपरीतका गतिविधिमा संलग्न भएको पाइएको छ ।

०७९ कात्तिक १६ गते विदुर नगरपालिका–४ बट्टारमा विदुर नगरपालिकाका उपमेयर प्रभा बोगटीले नेपाली कांग्रेस र नेकपा माओवादीको संयुक्त चुनावी कार्यक्रममा सहभागी हुनु भएको हो ।

उक्त चुनावी कार्यक्रममा नुवाकोट क्षेत्र नं. २ का नेपाली कांग्रेसका उम्मेदवार अर्जुननरसिंह केसी, क्षेत्र नं. २ प्रदेश ‘क’ का नेकपा माओवादी केन्द्रका उम्मेदवार रामप्रसाद ढुंगाना लगायतको सहभागिता रहेको कार्यक्रममा उपमेयर बोगटी पनि सहभागी हुनु भएको हो ।

स्थानीय तहका जनप्रतिनिधिले आफ्नो पालिकाभित्र कुनै चुनावी कार्यक्रममा सहभागी हुन समेत नपाइने र अर्को पालिकाको चुनावी कार्यक्रममा सहभागी हुन पाए पनि सरकारी स्रोत साधनको प्रयोग गर्न नपाइने व्यवस्था रहेको मुख्य निर्वाचन अधिकृतको कार्यालय नुवाकोटका आचारसंहिता अनुगमन अधिकृत रामशरण पुडासैनीले बताउनुभयो ।

जिल्लामा आचारसंहिता उलङ्घनका घटना फाट्टफुट्ट भएको पाइएको र त्यसलाई तत्काल आचारसंहिता अनुसारका काम गर्न निर्देशन दिइएको अधिकृत पुडासैनीको भनाई छ ।

गाडीमा झण्डा राख्ने, व्यानर बनाउने जस्ता घटना भेटिएको र तत्काल सच्याउन लगाएको लिखित उजुरी आएको हकमा लिखित रुपमा नै र मौखिक उजुरी आएको हकमा मौखिक रुपमा नै आचारसंहिता पालना गर्न निर्देशन दिइएको उहाँको भनाई छ ।

यस्तै, नुवाकोट क्षेत्र नं. १ का नेकपा एमालेका प्रतिनिधि सभातर्फका उम्मेदवार बद्री मैनालीले पैसा बाँडेको उजुरी परेपछि आयोगले नै मैनालीसँग स्पष्टीकरण माग गरेको थियो ।

विशेष गरी जनप्रतिनिधिहरूले आचारसंहिता विपरित आफ्नो स्थानीय तहमामा उम्मेदवारसँग भोट माग्न हिंडेको तस्वीरहरू सामाजिक सञ्जालमा राखिएको देखिए पनि उजुरी नपरेको भन्दै आचारसंहिता अनुगमन समिति मौन रहेको पाइएको छ ।


नवदीप श्रेष्ठ