अस्पताल सुधारको माग गर्दै थप चार जना आमरण अनसनमा

  ०७३ मङ्सिर ९ गते

राजविराज नपा-३ स्थित गजेन्द्रनारायण सिंह सगरमाथा अञ्चल अस्पतालमा सुधारको माग गर्दै आमरण अनसन बसेका नेपाल सद्भावना पार्टी गजेन्द्रवादीका राष्ट्रिय अध्यक्ष विकास तिवारीलाई साथ दिँदै थप चारजना मङ्सिर ९ गते बिहानदेखि आमरण अनसनमा बसेका छन् ।

आमरण अनसनमा मधेसी मोर्चाका जिल्ला संयोजक एवम् सरिता गिरी नेतृत्वको नेसपाका जिल्ला अध्यक्ष सुबी यादव, मोर्चाका सचिवालय सदस्य एवम् एकीकृत नेकपा माओवादी केन्द्रका केन्द्रीय सदस्य प्रभाकर सिंह, नेसपा गजेन्द्रवादीका केन्द्रीय सदस्यहरू एवम् मोर्चाका सचिवालय सदस्यहरू जयसुन्दर खिडहरी यादव र सावित्री पण्डित थपिएका हुन् । तिवारीले मङ्सिर ८ गते अपरान्हदेखि आमरण अनसन थालेका थिए ।

अस्पतालको अव्यवस्था र असुविधाको विरोध जनाउँदै मधेसी मोर्चा सप्तरीले अस्पतालमा विभिन्न सुधारको माग गर्दै कात्तिक १२ गते अल्टिमेटमसहितको २४ बुँदे ज्ञापनपत्र बुझाएको थियो ।

ज्ञापनपत्रमार्फत निशुल्क वितरण गरिने औषधिहरूको सूची, चिकित्सक, कर्मचारीको दैनिक समय तालिका सार्वजनिक रूपमा टाँस्नुपर्ने, प्राप्त बजेट र खर्च विवरण उपलब्ध गराउनु पर्ने, बिरामीहरूलाई पोषिलो र स्वच्छ पिउने पानीको व्यवस्था हुनुपर्ने, शौचालय र धाराहरू चालु हुनुपर्नेलगायतको माग गरिएको थियो ।


मनोहरकुमार पोखरेल