समाचारहरू

नेपाल सरकारले नागरिकलाई गुणस्तरीय सेवा घरदैलोबाट प्रदान गर्ने भने तापनि उत्तरगया गाउँपालिकामा आवश्यक भौतिक संरचनाको अभावले सेवा प्रवाह हुन सकेको छैन । गुणस्तरीय स्वास्थ्य सेवा प्रदान गर्न एक गाउँ एक अस्पताल खोल्ने भने पनि उत्तरगया गाउँपालिका र अस्पतालका लागि हालसम्म जग्गा प्राप्त हुन नसकेकोले सेवाग्राही समस्यामा परेका छन् ।

गाउँपालिका भवन निर्माणका लागि जग्गा प्राप्ति नभएपछि उत्तरगया गाउँपालिकाले अझै जोखिम स्थानमा रहेर सेवा प्रवाह गरिरहेको छ । तीन वर्ष अघि गाउँपालिकामा अस्पताल खोल्ने कुरा भए पनि हालसम्म कुरैमा सिमित भएको उत्तरगया गाउँपालिकाका स्थानीय पुरुषोत्तम पौडेलले बताउनु भयो । सार्वजनिक जग्गा रहेको ठाउँमा स्थानीय सरकारले अस्पताल बनाउन थाले राम्रो हुने उहाँको भनाइ छ । अस्पताल नहुँदा नुवाकोट र काठमाडौँ पुगेर सेवा लिन स्थानीयलाई समस्या परेको छ ।

जग्गा प्राप्ति नभएकोले अस्पताल निर्माण सुरु हुन सकेको छैन । जग्गा प्राप्तिका लागि सङ्घीय सरकारमा अनुरोध गरे पनि अनुमति प्राप्त नभएपछि जोखिम भएको ठाउँबाट काम चलाउन बाध्य भएको हो ।

उत्तरगया गाउँपालिका–५, खाल्टेमा हाल स्थानीय तह रहेकै सार्वजनिक जग्गामा अस्पताल तथा गाउँपालिका भवन निर्माण गर्नु पर्ने स्थानीय छेकु लामाले बताउनु भयो । उहाँले भन्नुभयो, ‘स्थानीय सरकार पहिलो पाँच वर्ष त अलमलमा पर्‍यो अब फेरी अलमलमा पर्न हुँदैन यहाँ अस्पताल र गाउँपालिका भवन तत्काल बनाएर नागरिकलाई चाँढो सरल र सहज ढङ्गले सेवा दिनुपर्छ ।’

उत्तरगया गाउँपालिका भवन तथा उक्त स्थानीय तहमा अस्पताल निर्माणका लागि खाल्टे बगर र पैरेबेशीमा रहेको सार्वजनिक जग्गा प्राप्तिका लागि स्थानीय सरकारले पटक पटक निर्णय गरेर सङ्घीय सरकारमा पठाए पनि अनुमति पाएको छैन । हाल गाउँपालिका रहेको खाल्टे बगरमा रहेको छ भने ग्रामीण स्वास्थ्य इकाइ, बोगटीटारमा रहेको छ ।

त्रिशूली नदिको जाखिममा रहेको कारण त्यहाँ भवन निर्माण नगर्न भूगर्भविद्ले अनुरोध गरेका छन् । पहिलो पाँच वर्षे कार्यकालमा स्थानीय सरकारले सहजिकरण गरे पनि जग्गा अस्पताल र गाउँपालिका भवन निर्माणका लागि प्राप्त हुन नसकेको उत्तरगया गाउँपालिका उपाध्यक्ष चमेली गरुङले जानकारी दिनुभयो ।

उत्तरगया गाउँपालिका उपाध्यक्ष चमेली गरुङले भन्नुभयो, 'खाल्टे र पैरेमा प्रसस्त सार्वजनिक जग्गा रहेको छ । तीन पटक लिखित रूपमा अनुरोध गरियो हालसम्म जग्गा प्राप्ति हुन सकेन, जग्गा प्राप्ति नभएपछि गाउँपालिकामा अस्पताल निर्माण हुन सकेको छैन ।'

खाल्टे र पैरेबेशीमा जोखिम क्षेत्र र निकुञ्जको मध्यवर्ती क्षेत्रमा रहेको भनेर जग्गा प्राप्ति हुन सकेको छैन । सार्वजनिक जग्गा प्राप्तिका लागि सङ्घीय सरकारको मन्त्री परिषद्बाट निर्णय हुने व्यवस्था छ ।

हेमनाथ खतिवडा