समाचारहरू

आवश्यक बजेट अभावमा जिल्लामा निर्माणाधिन १५ शैयाका अस्पताल निर्माण कार्यमा ढिलाई हुँदा सेवाग्राहीलाई समस्या भएको छ । जिल्लाका पाँच ओटा स्थानीय तहमा अहिले अस्पताल निर्माण कार्य चलिरहेको छ । निर्माण व्यवसायीले सम्पन्न गर्ने कामको आधारमा भुक्तानी गर्न नसक्ने अवस्था भएपछि निर्माण कार्य सुस्त गतिमा भएको बगनासकाली गाउँपालिकाका इन्जिनियर प्रमोद कुँवरले बताउनु भयो ।

निर्माण सम्पन्न गर्ने समयावधिमा काम सम्पन्न गर्न बजेट अभाव भएको छ । बगनासकाली, निस्दी, पूर्वखोला र माथागढी गाउँपालिकामा ४ वर्षअघि सुरू भएको अस्पताल निर्माण कार्य ७० प्रतिशतको हाराहारीमा मात्र सम्पन्न भएको छ । २०७८ असार २३ गतेदेखि अस्पताल निर्माणको काम थालनी गरिएको थियो भने ३ वर्षमा सम्पन्न गर्नुपर्नेमा म्याद थप डेढ वर्ष बितिसक्दासमेत अस्पताल निर्माण कार्यले खास गति लिन सकेको छैन ।

अस्पताल निर्माणका लागि सङ्घीय सरकारले आवश्यक बजेट समयमै व्यवस्थापन गर्न नसक्दा समस्या भएको बताइएको छ । निस्दीको आधारभूत अस्पताल निर्माणका लागि १६ करोड ६८ लाख, पूर्वखोलाको वीरकोटमा १२ करोड ५१ लाख, बगनासकालीको अस्पतालका लागि १४ करोड ५० लाख, माथागढीको झडेवामा १२ करोड ५० लाखमा ४ वर्ष अघि नै ठेक्का सम्झौता भइ काम अगाडि बढेको हो । रम्भा गाउँपालिकामा गत वर्षदेखि १६ करोड ३७ लाख ८९ हजारमा ठेक्का सम्झौता भई अस्पताल निर्माण कार्य अघि बढेको छ ।

यज्ञमूर्ति तिमिल्सिना