समाचारहरू

जिल्ला अस्पताल हुम्लामा सिटी स्क्यानको व्यवस्था नहुँदा सिटी स्क्यान गर्नुपर्ने बिरामीलाई थप उपचारका लागि जिल्ला बाहिर रिफर गर्ने गरिएको अस्पतालले जनाएको छ ।

सडक सुविधा नभएको अवस्थामा सिटिस्क्यान गर्नुपर्ने बिरामीहरू महङ्गो प्लेन भाडा तिरेर नेपालगञ्ज लगायतका अन्य सहरमा जानु पर्ने राया गाविस-५ का २२ वर्षीय सन्तोष रावलले गुनासो गरेका छन् ।

सिटिस्क्यान गर्नुपर्ने राया गाविस-५ का २२ वर्षीय सन्तोष रावल र सोही गाविस-७ का २१ वर्षीय जनविर रावललाई जिल्ला अस्पताल हुम्लाले असोज ११ गते सिटी स्क्यानका लागि नेपालगञ्ज रिफर गरिएको जिल्ला जनस्वास्थ्य कार्यालयका सूचना अधिकारी नरेशबाबु श्रेष्ठले जानकारी दिए । जिल्ला अस्पतालमा सुरुदेखि नै सिटी स्क्यान नभएको अस्पतालले जनाएको छ ।

कुटपिटबाट घाइते दुवै जनाको घाँटी र टाउकोमा चोट लागेको उपचारमा संलग्न स्वास्थ्यकर्मीले जनाएका छन् ।

दुवै जनालाई असोज ६ गते राति पाँच/छ जनाको समूहमा आएका व्यक्तिले कुटपिट गरेको जिल्ला प्रहरी कार्यालयका इन्स्पेक्टर ओमप्रकाश यादवले बताए । घाइतेलाई हेलिकप्टरमार्फत उद्दार गरी जिल्ला सदरमुकाम सिमकोट ल्याइएको प्रहरीले जनाएको छ । कुटपिटमा संलग्न व्यक्तिहरू फरार रहेको इन्स्पेक्टर यादवले बताए ।

नन्द सिंह