समाचारहरू

अस्पतालमा बेड नपाउँदा रामग्राम नगरपालिका–९ का ३५ वर्षीय कोभिड सङ्क्रमितको मृत्यु वैशाख १४ गते भएको छ ।

श्वास फेर्न कठिन भएपछि उनलाई वैशाख १३ गते बिहान पृथ्वीचन्द्र जिल्ला अस्पतालमा नै सामान्य उपचार सुरू गरिएकोमा उनलाई थप उपचारका लागि भैरहवाको भीम अस्पताल र बुटवलको कोरोना विशेष अस्पतालमा भर्ना गर्न प्रयास गरिएकामा बेड अभावले सो हुन नसकेपछि सामान्य अक्सिजन दिएर जिल्ला अस्पतालमै उपचार गर्दै आएको अस्पतालका मेडिकल सुपरिटेण्डेण्ट डाक्टर मोहम्मद नुरूल होदाले बताउनुभयो ।

दुई दिनअघि मात्र कोभिड सङ्क्रमित उनका बाबुको मृत्यु घरैमा भएको थियो । पछिल्लो २४ घण्टामा जिल्लामा ३४ जनालाई कोभिड सङ्क्रमण पुष्टी भएकोे जिल्ला स्वास्थ्य कार्यालय पश्चिम नवलपरासीका कोरोना फोकल पर्सन देवीलाल पौडेलले जानकारी दिनुभयो ।

दोस्रो चरणको कोभिड सङ्क्रमण सुरू भएदेखि नवलपासी पश्चिममा पाँच जनाको मृत्यु भएको स्वास्थ्य कार्यालय प्रमुख कृष्णप्रसाद पोखरेलले जानकारी दिनुभ्एको छ । पछिल्लो १० दिनमा रामग्राम नगरपालिकामा मात्र मृत्यु हुनेको सङ्ख्या चार पुगेको छ ।

नारायण पराजुली