समाचारहरू

अर्घाखाँची अस्पतालमा विशेषज्ञ डाक्टरको अभावका कारण दैनिक बिरामीको बढ्दो चाप भएको छ । अस्पतालमा बिरामीहरू डाक्टरबाट सेवा पाउन चार घण्टासम्म लाइनमा बसेर स्वास्थ्य जाँच गराउनु परेको सेवा ग्राहीहरूले गुनासो गरेका छन् ।

दैनिक अस्पतालमा स्वास्थ्य जाँच उपचारका लागि आउने प्राय जसो बिरामी भाइरल ज्वरो, टाउको र शरीर दुख्ने साथै स्वास प्रस्वासका समस्या भएका सेवा ग्राहीहरू बढ्दै गएको अस्पतालका कर्मचारीहरू बताउँछन् । सन्धिखर्क नगरपालिका-७, मर्काखोला गहतेडाँडा बस्ने ७० वर्षीया बसन्ती कुमाल भन्नु हुन्छ, 'ज्वरो आएको छ । टाउको दुखेको र स्वास प्रस्वासको समस्या छ । बिहान १० बजे आएर नाम लेखाएर लाइनमा बसेको १ बजिसक्यो अझ पालो आएको छैन । कति बेला डाक्टर भेट्न पाइने हो ।'

मालारानी गाउँपालिका-५, बाँगीका ६९ वर्षीय चन्द्र बहादुर विकले, 'पहिला अन्य बिरामी भएर हस्पीटल बसेर घर गएँ । अस्पतालमा बिरामीको चाँप बढेको थियो । अर्काे दिनदेखि ज्वरो आउने, टाउको दुख्ने, शरीर दुख्ने र खान मन नलाग्ने भएपछि फेरि अस्पताल आएर चेक जाँच गराउँदा डेङ्गुको सङ्क्रमण भएको रिर्पोट आयो र भर्ना हुनु परेको बताउनु हुन्छ । भूमिकास्थान नगरपालिका-८, चिउरामाटीका ७२ वर्षीय लोकनाथ भुसालले आफूलाई स्क्रब टाइफस सङ्क्रमण भएको बताउनु भयो । उहाँले अस्पतालमा आउने बिरामीहरूको चाप अनुसार डाक्टर तथा सेवा प्रदायकहरू कम भएको महशुस गरेको बताउनु भयो ।

जिल्ला अस्पताल, अर्घाखाँचीका अहेब तथा सूचना अधिकारी निमबहादुर रानाले अस्पतालमा बिरामी बढ्दै गएको बताउनु भयो । अस्पतालमा कर्मचरीको अभावका कारण सरसफाई र पानीको समस्या पनि थपिँदै गएको उहाँले जानकारी दिनुभयो । उहाँले अस्पतालमा १० जना विशेषज्ञ डाक्टरको दरबन्दी भएकोमा दुई जना विशेषज्ञ डाक्टरबाट गुणस्तरीय सेवाका लागि प्रयासरत भए पनि बिरामीको चाप अनुसार सेवामा थप समस्या हुँदै गएको बताउनु भयो ।

अर्घाखाँची अस्पतालका प्रमुख (मेसु) डा. जगनाथ तिवारीले नर्मल अवस्थामा दैनिक बिरामी २ सयदेखि २ सय ५० जनासम्म ओपिडिमा आउने गरेको बताउनु भयो । अहिले बिरामीको चाप बढ्दै गएको हुँदा दैनिक ३ सय ५० देखि ४ सय जनासम्म चेक जाँचमा आइरहेको उहाँको भनाइ छ । ओपिडिमा आउने बिरामीहरू ६० प्रतिशतभन्दा बढी ज्वरो आउने, टाउको दुख्ने समस्या भएका सबै उमेरका आउने गरेको र ३० प्रतिशतभन्दा बढी दमको समस्या भएका ज्येष्ठ नागरिकहरू आउने गरेको बताउनु भयो ।

उहाँले अस्पतालमा विशेषज्ञ डाक्टरको अभाव र दैनिक बिरामीको चापसँगै भवनको पनि अभाव भएको बताउनु भयो । अहिले भएको भवन धेरै पुरानो भएकोले सेवा उपलब्ध गराउने ठाउँ र व्यवस्थापन पनि पुरानै ढाँचाका भएको हुँदा थप समस्या हुने गरेको उहाँको भनाइ छ । यो समस्याका लागि सम्बन्धित निकाय र प्रतिनिधिहरूसँग धेरै पटक अवगत गराउँदै आग्रह गरे पनि सुनुवाई हुन नसकेको उहाँले उल्लेख गर्नुभयो ।

कुलबहादुर नेपाली