समाचारहरू

१५ शैयाको जिल्ला अस्पताल हुम्लामा एक महिनादेखि औषधि अभाव भएको छ । अस्पतालमा औषधि अभाव देखिएपछि जिल्ला अस्पताल हुम्लामा उपचार गर्दै आएका बिरामीले निजी मेडिकलको महङ्गो मुल्य तिरेर औषधि किन्न बाध्य भएका छन् ।

रुघाखोकी, हात खुट्टा दुख्ने, दम, प्रेसर लगायतका बिरामी दिनदिनै जिल्ला अस्पातलमा उपचारका लागि आउने भएपनि औषधि अभाव भएपछि खाली हात घर फर्किन बाध्य भएका हुन् ।

अस्पतालमा औषधि नभएपछि निजी मेडिकलबाट औषधि ल्याएर खानु परेको सिमकोट गाउँपालिका–६ की रत्ना सुनारले गुनासो गर्नु भएको छ ।

पेट दुख्ने, शरीर काम्ने समस्याले १५ दिनदेखि जिल्ला अस्पताल हुम्लामा उपचार भइरहेको सुनारले बताउनु भयो ।

अस्पतालको ओपिडिमा समेत सामान्य सिटिजेट, एसिलक र बालबालिकाहरूका लागि पारासिटामोल, सिरफ प्रेसरको औषधि नभएको बहिरङ्ग सेवामा औषधि वितरण गदैँ आएका जगवीर रावतले जानकारी दिनु भयो ।

ओपिडिमा रुघाखोकी, हात खुट्टा दुख्ने, बान्ता हुने र बालबालिकाहरू उपचार गर्न आउने भएपनि औषधि नभएपछि फिर्ता जान बाध्य भएको स्वास्थ्यकर्मी रावतको भनाई छ ।

जिल्ला अस्पताल हुम्लामा १५ देखि २० प्रकारका औषधि नभएको स्टोर किपरको जिम्मा लिनु भएका कलबहादुर रावतले बताउनु भयो ।
सामान्य ग्यास्टिकको औषधि, डिक्लो, एसिलक, पेनटक, पारासिटामोल र सिरफ समेत अभाव भएको उहाँको भनाई रहेको छ ।
इमरजेन्सी वाडमा सलाइन र सिरिन्ज समेत अभाव भएको स्वास्थ्य कार्यालयकी निमित्त प्रमुख सरिता बोहराले बताउनु भयो ।
उहाँले ७२ थरीका औषधिको लागि क्षत्रीय स्टोर सुर्खेतमा माग फारम पेश गरेको निमित्त प्र्रमुख बोहराको भनाई छ ।

नन्द सिंह