समाचारहरू

पाल्पा अस्पतालको भवन निर्माण कार्य अलपत्र हुँदा सेवाग्राहीलाई समस्या भएको छ । एक सय वर्ष पुरानो जीर्ण भवनबाट पाल्पा अस्पतालको सेवा प्रवाह हुँदै आएको छ । दैनिक ६ सय जनासम्म बिरामी आउने यो अस्पतालको पुननिर्माणका लागि हरेक वर्ष बजेट विनियोजन हुने गरेपछि कार्यान्वयन नहुँदा बजेट फर्कने गरेको हो ।

विगत तीन वर्षदेखि अस्पताल निर्माणका लागि विनियोजित करोडौँ रकम काम नभई फिर्ता हुँदै आएको छ । भवन निर्माणका लागि आवश्यक जग्गा प्रबन्ध हुन नसक्दा अस्पतालको सेवा जीर्ण भवनमै सीमित भएको छ । आर्थिक वर्ष २०७८/७९ मा पुर्ननिर्माण प्राधिकरणबाट ६० करोड रुपियाँ रकम सुनिश्चित भएको थियो । तर भवन निर्माणका लागि आवश्यवक जग्गा उपलब्ध नहुँदा रकम फिर्ता गएको थियो ।

पाल्पा अस्पतालको स्वामित्वमा अहिले आठ रोपनी जग्गा छ । लुम्बिनी प्रदेश सरकारले चार वर्षअघि यस अस्पताललाई १ सय शैयाको बनाउने निर्णय गरेको थियो । अस्पतालको नयाँ भवन बनाउनका लागि कम्तीमा १२ रोपनी जग्गा आवश्यक हुन्छ ।

भवन निर्माण गर्न जग्गा व्यवस्थापन गर्न नसक्दा सङ्घीय सरकारबाट भवन निर्माणका लागि विनियोजन भएको रकम फिर्ता हुने गरेको पाल्पा अस्पताल प्रशासन शाखाका प्रमुख सुशिल ज्ञवालीले बताउनु भयो । आर्थिक वर्ष ०८०/८१ मा अस्पतालको भवन निर्माणका लागि सङ्घीय सरकारबाट १२ करोड बजेट विनियोजन भएको थियो । उक्त रकम समेत यो वर्ष खर्च हुन नसकेको ज्ञवालीले बताउनु भयो ।

२०८१/८२ मा पुनः भवन निर्माण गर्न २ करोड रकम विनियोजन गरेको छ । हाल अस्पताल रहेको क्षेत्रवरपर जग्गा व्यवस्थापन गर्न नसक्दा हरेक वर्ष रकम फिर्ता भएको ज्ञवालीले बताउनु भयो । पुरानो र जीर्ण भवनबाट धेरै बिरामीलाई सेवा दिन कठिनाई भएको अस्पतालका मेडिकल सुपरीटेन्डेन्ट डा. राजेन्द्रबहादुर जिसीले बताउनु भयो । जीर्ण र साँघुरो भवनमा बिरामी जाँच गर्ने कक्षसमेत व्यवस्थापन गर्न गाह्रो भएको उहाँले बताउनु भयो ।

नेपालको संविधान २०७२ को भाग ३ को धारा ३५ मा प्रत्येक नागरिकलाई स्वस्थ्य र स्वच्छ वातावरणमा बाँच्न पाउने हक र जनस्वास्थ्य सेवा ऐन २०७५ को परिच्छेद २ को दफा ३ मा स्वास्थ्य सेवाको पहुँच तथा सुनिश्चितता उल्लेख गरिएको छ । सोही दफाको उपदफा १ मा प्रत्येक नागरिकलाई गुणस्तरीय स्वास्थ्य सेवा सहज र सर्वसुलभ रूपमा प्राप्त गर्ने अधिकार किटान गरिएको छ । तर, पाल्पा अस्पतालमा भने भवन निर्माण कार्य अलपत्र हुँदा सेवाग्राहीलाई समस्या भएको छ ।

यज्ञमूर्ति तिमिल्सिना