समाचारहरू

१४ शैया क्षमता भएको पर्वत जिल्ला अस्पतालले सञ्चालनमा ल्याएको औषधि विक्री कक्ष (फार्मेसी सेवा) बन्द हुँदा सेवाग्राही मर्कामा परेका छन् ।

०७३ साल साउन १ गतेदेखि अस्पतालले सञ्चालनमा ल्याएको फार्मेसी वैशाख १ गतेदेखि बन्द हुँदा अस्पतालमा उपचार गराउने बिरामीलाई समस्या परेको हो ।

जिल्ला अस्पताल पर्वतले निशुल्क पाइने औषधि बाहेकका अन्य औषधि चिकित्सकको अनुमतिमा बिरामीलाई छुट सेवा दिएर विक्री वितरण गर्ने गरी फार्मेसी सञ्चालनमा ल्याएको थियो ।

पछिल्लो समय फार्मेसीमा कार्यरत फर्मासिष्ट कर्मचारी सम्राट शर्मा र व्यवस्थापन पक्ष बीच तलब र व्यवस्थापनका विषयमा विवाद भएपछि फार्मेसी महिना दिनदेखि बन्द भएको हो ।

अस्पताल फार्मेसी सेवा निर्देशिका २०७२ बमोजिम औषधिको मुल्यमा ७ प्रतिशत रकम छुट दिने गरी ल्याइएको फार्मेसी बन्द भएपछि औषधोपचारका लागि जिल्ला अस्पतालमा आएका बिरामीहरू औषधि लिनकै लागि निजी क्लिनिकमा धाउन बाध्य भएका छन् ।

निर्देशिका अनुसार १५ देखि २५ शैया सम्मको क्षमता भएको अस्पतालले फार्मेसी सेवा सञ्चालन गरी बिरामीलाई औषधिको सेवा दिनुपर्ने प्रावधान रहेको छ ।

गण्डकी प्रदेश सरकार मातहतमा सञ्चालित जिल्ला अस्पतालमा सुरक्षित प्रसूतिका लागि आएकी कुश्मा नगरपालिका–१३ खौलालाँकुरीकी यमुना क्षेत्रीका पति यामबहादुर क्षेत्रीले अस्पताल भित्र औषधि कक्ष बन्द हुँदा आफू निजी क्लिनिकमा धाउनुपरेको दुखेसो पोखे ।

‘अस्पताल भित्र फार्मेसी त छ । तर, कहिल्यै खुल्दैन ।’–उनले भने–‘डाक्टरले लेखेको कागज लिएर बाहिर दगुर्नुपर्छ ।’

उपचारकै लागि जिल्ला अस्पताल पर्वतमा आएका बागलुङ कुश्मीसेरा नगरपालिका–५ का ३९ वर्षीय ठाकुर लम्सालले पनि औषधिका लागि निजी क्लिनिकमा जानु परेको दुखेसो गरे ।

पर्वत जिल्ला अस्पताल विकास समितिका अध्यक्ष गोविन्द पहाडीले फार्मेसी छिट्टै सञ्चालनमा ल्याउने तयारी भइरहेको बताए ।

उनले बिरामीहरूको तीव्र गुनासो आएपछि कर्मचारी छनोटको काम अघि बढाइएको र सञ्चालनमा ल्याउने गरी काम भइरहेको बताए ।

सन्तोष थापा