समाचारहरू

नारायणी अस्पतालको इमर्जेन्सी प्रयोगशालामा कार्यरत प्राविधिक वीरगञ्ज–२६ बस्ने २८ वर्षिय अताउल हक र स्वीपर ४२ वर्षिय महेन्द्र राउतलाई कुटपिट गरेको आरोपमा प्रहरीले बारा जिल्लाको प्रसौनी गाउँपालिका–६ का २६ वर्षीय आदर्श साह र २० वर्षीय आकाश साहलाई चैत ७ गते गिरफ्तार गरेको छ ।

आरोपितहरू चैत ७ गते राति साढे नौ बजेतिर प्रयोगशालामा रगत परीक्षणको रिपोर्ट माग्न गएका बेलामा ‘रिपोर्टका लागि एकैछिन पर्खनुस’ भन्दा आक्रोशमा आएर कुटपिट गरेको पीडितहरूले आरोप लगाएका छन् ।

४/५ जनाको समूहले पीडितद्वयलाई कुटपिट गरेको अस्पतालले जनाएको छ ।

दुवैजनालाई नियन्त्रणमा लिएर घटनाका बारेमा थप अनुसन्धान भइरहेको जिल्ला प्रहरी कार्यालय पर्साका प्रवक्ता डिएसपी ओमप्रकाश खनालले जानकारी दिनु भयो ।

घटनामा संलग्न अन्य व्यक्तिहरूको खोजी भइरहेको डिएसपी खनालको भनाइ छ । आरोपितद्वयले प्रयोगशाला भित्रै पसेर कुटपिट गर्दा माइक्रोस्कोप, कम्प्युटर, प्रिन्टर, कुर्सी, ट्युब राख्ने भाँडो लगायतका सामग्रीमा क्षति पुगेको छ ।

प्रयोगशालामा १ लाख ५० हजार रुपियाँ बराबरको नोक्सानी भएको इञ्चार्ज हिराबाबु पाण्डेले जानकारी दिनु भयो ।

कृष्णचन्द्र लामिछाने