समाचारहरू

रेसुङ्गा नगरपालिका स्थित गुल्मी अस्पतालको नयाँ भवन निर्माण कार्य अलपत्र परेर पुरानो भवनमा सञ्चालन हुँदा सेवाग्राहीलाई समस्या भएको छ ।

गुल्मी अस्पतालमा अहिले दैनिक करिब ४ सय जना बिरामीले सेवा लिइरहेका छन् । बिरामीहरूको भिडले अस्पतालमा खुट्टा टेक्ने ठाउँ हुँदैन । बिरामीहरूको चापलाई हेरेर अस्पतालले ४ महिनादेखि बिहान ९ बजेबाटै ओपिडी सेवा सुरु गरेको छ । तर, अस्पतालको संरचना राम्रो नहुँदा सेवा प्रवाहमा सास्ती खेपिरहेका छन् ।

चार दशक पुरानो जीर्ण भवनबाट अहिले पनि ५० शैया अनुसारको सेवा अस्पतालले थेगिरहेको छ । बिरामी बढ्दा सुताउने ठाउँ हुँदैन । एउटा कोठामा तीन जना डाक्टर बसेर बिरामी हेर्नुपर्ने अवस्था संरचनाको कारण भइरहेको छ । तर, अस्पतालको अत्याधुनिक भवन समयमै निमार्ण हुन नसकेको गुल्मी अस्पताल, तम्घासको अस्पताल विकास समिति अध्यक्ष गोपालप्रसाद पाण्डेयले गुनासो गर्नुभयो । गुल्मी अस्पताल ०७१ सालमा ५० शैयामा स्तरवृद्धि भएको थियो ।

करिव सात वर्षपछि ०७८ असार १८ गते राष्ट्रिय पुनर्निमाण प्राधिकरणबाट नयाँ भवनको लागि बजेट विनियोजन भएर निर्माण सम्झौता भएको थियो । सम्झौता अनुसार ०८० असार १७ गतेसम्म निर्माण व्यावसायीले काम सक्नुपर्थ्यो । तर, ६ महिना म्याद थप गर्दा पनि काम सकिएको छैन । स्वच्छन्द–बानियाँ जे.भी हेटौँडाले पाँच तल्लाको भवन निर्माणको लागि २५ करोड ९५ लाख ६४ हजार २ सय ३ रुपियाँमा सम्झौता गरेको छ । समयमै भवनको काम नहुँदा सेवा गुणस्तरीय बनाउन र थप सेवा बिस्तार गर्न आफूहरूलाई कठिन भएको अस्पताल विकास समिति अध्यक्ष पाण्डेयले बताउनु भयो ।

पुरानो भवन जिर्ण छ । साँघुरा कोठाको कारण बिरामी र डाक्टर दुवै पक्षलाई सास्ती भएको छ । तर, निर्माण व्यावसायीले आफूहरूको पीडा नबुझेको पाण्डेयले बताउनु भयो । भवनको अहिलेसम्म करिव ७५ प्रतिशत भौतिक प्रगति भएको निर्माण कम्पनीका इन्जिनियर सागर दुलालले जानकारी दिनुभयो । भवनको फिनिसिङ्गका धेरै काम गर्न बाँकी छ । निर्माण व्यवसायीबाट म्याद थप भए पनि कामले सोचे अनुसारको गति लिएको छैन । समयमै भवन निर्माणको काम सम्पन्न हुने भनिए पनि कामको गति अत्यन्तै सुस्त रहेको छ । नयाँ भवनमा आइसीयु कक्ष, सर्जिकल, मेडिकल, चिल्ड्रेन लगायतका उपचार कक्षको छुट्टाछुट्टै व्यवस्था रहेको छ ।

भवनलाई जतिसक्दो छिटो सम्पन्न गर्न पहल गर्दै आएपनि निर्माण पक्षबाट काम सुस्त हुँदा सेवा प्रवाहमा समस्या हुँदै आएको अध्यक्ष पाण्डेयले जानकारी दिनुभयो । गुल्मी अस्पतालमा हाडजोर्नी, गाइनोलोजिष्ट, हेमो डायलाइसिस सेवा लगायतका सेवा बिस्तार भएका छन् । अहिले आइसियु सेवा सञ्चालनको लागि व्यावस्थापकीय काम अगाडि बढेको छ । तर, पुर्वाधारको अभावमा सबै काम निकै कष्ट र चुनौतिपूर्ण रहेको गुल्मी अस्पतालका प्रमुख डाक्टर किशोर बन्जाडेले बताउनु भयो ।

यो वर्ष गुल्मी अस्पताल आन्तरिक मूल्याङ्कनमा लुम्बिनी प्रदेशमै तेस्रो भएको थियो । तर, उत्कृष्ट हुन भौतिक पूर्वाधारका सूचकहरूमा नम्बर पाउने अवस्था आफूहरूको नभएको बन्जाडेले बताउनु भयो । उहाँले सबै तहका जनप्रतिनिधिलाई अस्पतालको भौतिक संरचना र नयाँ भवनको कामको विषयमा ध्यानाकर्षण गराएको बताउनु भयो । ‘सेवा प्रवाह गुणस्तरीय बनाउन भौतिक पूर्वाधारको ठूलो महत्व रहेको छ । तर, हामी एकै कोठामा तीन/चार जना डाक्टर राखेर काम गरिरहेका छौँ । ५० शैयाको अस्पतालको सेवा पूर्ण फेजमा सञ्चालन गर्न सकिरहेका छैनौ', बन्जाडेले भन्नुभयो ।

संरचनाको कारण अस्पताल प्रशासनसँगै नागरिकलाई समेत सास्ती भएको छ । अस्पतालमा आएका सेवाग्राही राम्रोसँग उभिएर सेवा लिने अवस्था छैन । यो गुल्मी र अर्घाखाँचीका नागरिकको सबैभन्दा ठूलो अस्पताल हो । दैनिक सयौँ जनाले सेवा लिइरहेको अस्पतालको भौतिक संरचनामा ढिलासुस्ती हुनु निकै दुखद विषय बनेको रेसुङ्गा नगरपालिका–३ का स्थानीय प्रेम केसीले गुनासो गर्नुभयो । उहाँले गाउँगाउँमा १५ शैयाका अस्पतालको नाममा उपयोग विहिन बजेट खर्च गर्नभन्दा गुल्मी अस्पताललाई छिटो निर्माण र सुविधा सम्पन्न बनाउनुपर्नेमा जोड दिनुभयो ।

टोपलाल अर्याल