समाचारहरू

एक सातादेखि नियमित रूपमा परेको अविरल वर्षाले कक्षा कोठामा पानी पस्दा सिमकोट गाउँपालिका–५ स्थित बालमन्दिर माविका विद्यार्थीहरू खुल्ला चौरमा पठनपाठन गर्न बाध्य भएका छन् ।

विद्यालयको कक्षा कोठामा पानी पसेको कारण विद्यार्थीहरूलाई चौरमा राखेर पठनपाठन गराउन बाध्य भएको विद्यालयका प्रधानध्यापक कैलाश रोकायाले बताउनु भयो । अविरल वर्षाले कक्षा कोठाभरी पानी पसेपछि विद्यार्थीलाई बस्न नमिल्ने हुँदा चौरमा डेस्क, बेञ्च ल्याएर पठनपाठन गराइएको प्रधानध्यापक रोकायाले बताउनु भयो । वर्षायाममा पानी पर्दा विद्यार्थीले प्रायजसो चौरमा पठनपाठन गर्दै आएको विद्यालयका प्रधानाध्यापक रोकायाको भनाइ छ ।

सधैँ पानी पर्दा विद्यार्थीले चौरमा पठनपाठन गर्नुपर्ने बाध्यताको अन्त्य गर्न विद्यालयले सिमकोट गाउँपालिकालाई आग्रह गरे पनि सुनुवाई नभएको उहाँले उल्लेख गर्नुभयो । पानी पर्दा विद्यार्थीले भोग्नु पर्ने समस्या अन्त्य गर्न आग्रह गरिएको उहाँले बताउनु भयो । राति पानी पर्ने र कक्षा कोठामा पानी पसेर असर गर्दा दिउँसो विद्यार्थीलाई खुल्ला आकाश मुनीको चौरमा पठनपाठन गराउँदा थप समस्या हुने गरेको छ ।

पठनपाठनमा समस्या हुँदा समेत कसैले ध्यान नदिएको कक्षा ५ मा अध्ययनरत रमिला बुढाले गुनासो गर्नुभयो । उहाँले मौसम सफा भएको दिनमा मात्रै विद्यालय जाने बताउनु भयो । पानी परेको दिनमा पठनपाठन थप प्रभावित हुने गरेको बुढाले जानकारी गराउनुभयो ।

नन्द सिंह