समाचारहरू

लैनचौरस्थित अमृत साइन्स क्याम्पसमा ०८० वैशाख १७ गते नेकपा एमाले समर्थित अनेरास्ववियु र माओवादी निकट अखिल क्रान्तिकारीका नेताबीच झडप हुँदा दुई जना घाइते भएका छन् ।

झडपमा परी एमाले निकट अनेरास्ववियुका कार्यकर्ता कैलालीका २६ वर्षीय रमेश फुलारा र बर्दियाका २९ वर्षीय खेम सिंह घाइते भएको जिल्ला प्रहरी परिसर काठमाडौँका प्रवक्ता एसपी सिताराम रिजालले जानकारी दिनुभयो ।

एसपी रिजालका अनुसार वैशाख १६ गते अखिल क्रान्तिकारीका विद्यार्थीले अनेरास्ववियुका कार्यकर्ता रमेश फुलारामाथि आक्रमण गरेका थिए । आफ्ना कार्यकर्तामाथि क्रान्तिकारी निकट कार्यकर्ताले कुटपिट गरेपछि त्यसको बदला लिन वैशाख १७ गते अनेरास्ववियुका नेता कार्यकर्ताले अखिल क्रान्तिकारीका अस्कल अध्यक्ष खेम सिंहमाथि कुटपिट गरेका हुन् ।

कुटपिटबाट घाइते भएकाहरूलाई राष्ट्रिय ट्रमा सेन्टरमा उपचार गरिएको राष्ट्रिय ट्रमा सेन्टरका डाक्टर जनकराज पोखरेलले बताउनु भयो ।

कुटपिटबाट घाइते भएका फुलाराको टाउकोमा आठ ओटा टाँका लगाइएको र अस्पतालको इमर्जेन्सी विभागमा उपचार भइरहेको डाक्टर पोखरेलले जानकारी दिनुभयो ।

त्यस्तै घाइते रहेका सिंहको हातमा चोट लागेको र उपचारपश्चात अस्पतालबाट डिस्चार्ज भएको डाक्टर पोखरेलले भन्नुभयो ।

प्रहरीले झडपमा संलग्न भएको आरोपमा एमालेनिकट अनेरास्ववियुका कार्यकर्ता बझाङका २८ वर्षीय कमल जोशी, कालिकोटका २६ वर्षीय गोपाल जङ्ग शाही, बाँकेका २२ वर्षीय सौजन शाही, झापाका २७ वर्षीय दिपक सिटौला र मोरङका २७ वर्षीय बिबेक कोइरालालाई गिरफ्तार गरेको छ ।

गिरफ्तारीमा परेकाहरूलाई प्रहरी वृत्त लैनचौरमा राखिएको एसपी रिजालले जानकारी दिनुभयो ।

विमल पौडेल