समाचारहरू

चौतारा सागाचोकगढी नगरपालिका-७ का २३ वर्षीय सरोज श्रेष्ठ अपाङ्ग भएकै कारण विद्यालयमा पढ्नबाट वञ्चित भएका छन् ।

पाँच वर्षअधि कक्षा ६ मा पढ्दै आउनुभएका सरोजलाई कक्षामा उमेर अनुसारको समूह नमिलेको भन्दै विद्यालयले भर्ना गर्न नमानेको सरोजकी दिदि सुशिला श्रेष्ठले बताउनु भयो ।

कक्षा ६ उतिर्ण हुँदा सरोज १८ वर्ष पुरा हुनुभएको थियो । तर सोही कक्षामा पढ्ने अन्य विद्यार्थीहरू भने बढीमा १२/१३ वर्षको मात्र भएकोले कक्षामा उमेर समूह नमिलेकोले विद्यालयमा भर्ना गर्न समस्या भएको श्री सिद्धि गणेश माविका साहायक प्रधानाध्यापक तिलकबहादुर दङ्गालले बताउनु भयो ।

शारीरिक रुपले अपाङ्ग हुनुभएका सरोज चार वर्षसम्म उपचारको क्रममा अस्पताल बस्नुपरेकोले पढाइमा ढिला भएको उहाँ बताउनुहुन्छ । आफूलाई पढ्ने इच्छा हुँदाहुँदै विद्यालयले भर्ना नगरेकोले आफूलाई दुःख लागेको सरोज श्रेष्ठले इन्सेकलाई बताउनु भयो ।

‘क’ वर्गको अपाङ्ग परिचय पत्र पाउनुभएका सरोजले सरकारबाट उपलब्ध गराउने सामाजिक सुरक्षा भत्ता मासिक ४ हजार रुपियाँ पाउनुहुन्छ । सामाजिक सुरक्षा भत्ताबाट प्राप्त भएको रकमले आफ्नो जीवन धान्न परेको सरोज बताउनुहुन्छ ।

दाहिने हात र खुट्टाले काम नगरेर अपाङ्ग भएका सरोज अन्य प्रविधियुक्त काम गरेर जिवनयापन गर्ने रहर भए पनि अपाङ्ग भएका कारण पढ्न नपाएकोले आफ्नो रहर पुरा नभएको दुखेसो पोख्नुहुन्छ ।

नेपालको संविधान २०७२ को मौलिक हकको धारा ३१ मा शिक्षासम्बन्धी हकको व्यवस्था गरेको छ जसमा सबै नागरिकलाई आधारभूत शिक्षामा पहुँचको प्रत्याभूत गरिएको छ । त्यसैगरी अपाङ्गता भएका र आर्थिक रूपले विपन्न नागरिकलाई कानुन बमोजिम निःशुल्क उच्च शिक्षा पाउने हक हुने भनिएको छ । तर चौतारा सागाचोकगढी नगरपालिका-७ का २३ वर्षीय सरोज श्रेष्ठ अपाङ्ग भएकै कारण शिक्षाको अधिकारबाट वञ्चित हुनु परेको छ ।

नातिबावु धिताल