समाचारहरू

अपाङ्गता भएका व्यक्तिहरुको अधिकारको लागि दुई जना अपाङ्गता भएका युवाहरुले काठमाडौं देखी पोखरासम्मको ह्विलचियरको यात्रा गर्नुभएको छ । काठमाडौंका दिवस परियार र आशिष भुजेल गत चैत ३ गते काठमाडौंको भृकुटीमण्डपबाट ह्विलचियर यात्रा गरि चैत ७ गते साँझ तनहुँको दमौली आइपुग्नु भएको हो ।

‘दिगो विकासको लक्ष्य, अपाङ्गतामैत्री भविष्य’ भन्ने नाराका साथ आफुहरु काठमाडौं देखि पोखरासम्मको ह्विलचियर यात्रामा हिडेको दिवस परियारले बताउनु भयो । उहाँहरुलाई दमौलीमा व्यास नगरपालिकाका प्रमुख बैकुण्ठ न्यौपाने, उपमेयर इन्दिरा दरै, राष्ट्रिय सभाका पुर्व सदस्य प्रकाश पन्थ, अपाङ्गता अधिकारकर्मी मदन पौडेल, लगायतले दमौलीमा स्वागत गर्नुभएको थियो ।

अपाङ्गतामैत्री संरचनामा पहुँचयुक्ततामा जोड दिन राज्यलाई रचनात्मक किसिमले ध्यानाकर्षण गराउने आफुहरुको मुख्य उद्देश्य रहेको आशिष भुजेलले बताउनु भयो । सो अवसरमा व्यास नगरपालिकाका प्रमुख बैकुण्ठ न्यौपानेले ब्यास नगरपालिकाको प्रशासकीय भवन पुर्ण रुपमा अपाङ्गतामैत्री रहेको भन्दै अन्य निर्माणाधिन संरचनाहरु पनि अपाङ्गतामैत्री बनाउने बताउनु भयो । प्रमुख न्यौपानेले युवाहरुको साहसिक कार्यको प्रसंशा गर्दै व्यास नगरपालिकाको तर्फबाट बाटो खर्च स्वरुप आर्थिक सहयोग उपलब्ध गराउनु भएको थियो ।

यात्राको क्रममा कुनै समस्या पर्न सक्ने भएकाले अन्य दुई जना सहयोगी सहित चार जनाको टोली काठमाडौं पोखराको यात्रामा हिड्नु भएको हो । अपाङ्गता भएका व्यक्तिहरुले पनि महत्वपूर्ण काम गर्न सक्ने र फरक क्षमता भएका व्यक्तिलाई दया माया भन्दापनि अवसरको खाँचो रहेको भुजेलले बताउनु भयो । अब नयाँ बन्ने हरेक संरचना अपाङ्गमैत्री हुनुपर्ने, अपाङ्गताको अधिकारको कार्यान्वयन हुनुपर्ने आफुहरुको माग रहेको उहाँहरुले बताउनु भयो ।

प्रकाशचन्द्र भट्टराई