समाचारहरू

रामेछाप जिल्लामा अपाङ्गता भएका महिला र बालिकाहरू बलात्कारका घटनामा पीडित हुनेको सङ्ख्या बढ्दो क्रममा पाइएको छ ।

सन २०२२ मा जिल्लामा अभिलेख गरिएका मानव अधिकार उल्लङ्घन तथा ज्यादतीका घटनालाई हेर्दा बलात्कारका घटनामा पीडित महिला र बालिकाहरूमा पूर्णरूपमा अपाङ्गता भएकासम्म पीडित भएका छन् ।

जिल्लमा वर्षभरिमा भएका १८ ओटा बलात्कारका घटना अभलिेख भएकोमा ६ जना अपाङ्गता भएका महिला र बालिका बलात्कारका घटनामा पीडित भएका छन् । जसमा एक जना पूर्ण रूपमा असक्त महिला पनि बलात्कार घटनामा पीडित भएकी छन् ।

कूल १८ ओटा बलात्कारका घटनामा १० जना महिला पीडित भएका छन् । जसमा चार जना अपाङ्गता भएका महिला छन् । चार मध्ये तीन जना बोल्न नसक्ने महिला छन् । एक जना बोल्न तथा उठ्न समेत नसक्ने महिला पीडित भएकी हुन् ।

यसै गरी सन् २०२२ मा आठ जना बालिका बलात्कारको घटनामा पीडित भएका छन् । ती मध्ये दुई जना अपाङ्गता भएका बालिका छन् । दुवै अपाङ्गता भएका बालिका बोल्न नसक्ने हुन् ।

बलात्कारको घटना आफैँमा जघन्य अपराधका घटना भएकोमा अपाङ्गता भएका महिला र बालिका बलात्कृत हुनु थप जघन्य अपराधको घटना भएको रामेछापका न्यायाधीवक्ता योगन्द्रप्रसाद ढुङ्गेल बताउनुहुन्छ ।

यो वर्ष बलात्कारका घटना पीडित हुनेको अवस्था हेर्दा समाजमा मानवीय आचरण विचलित हुन थालेको भन्दै उहाँले चिन्ता व्यक्त गर्नुभयो ।

‘बोल्न नसक्ने अपाङ्गलाई बलात्कार गर्दा घटना सार्वजनिक हुँदैन र जोगिन सकिन्छ भन्ने मानसिकताले यस्ता घटना भएका हुन सक्छन्’, ढुङ्गेलले भन्नुभयो ।

नवराज पथिक