समाचारहरू

दिक्तेल रूपाकोट मझुवागढी नगरपालिका-१३ थुनथलाको सार्वजनिक कार्यक्रममा उपमेयर विसन राईले अपाङ्गता भएकाहरूलाई “समाजको भार” भनेपछि अदालतले ५० हजार रुपियाँ धरौटी माग गरेको छ ।

अपाङ्गता भएकाहरूलाई जनप्रतिनिधिले सार्वजनिक कार्यक्रममा मानमर्दन हुने गरी दुर्व्यवहार गरेको आरोपमा पीडित पक्षले जिल्ला अदालतमा ०८१ भदौ ५ गते मुद्दा दर्ता गरेको थियो ।

जिल्ला अदालतका न्यायाधीश नारायणप्रसाद दाहालको भदौ ६ गते आदेशले ५० हजार रुपियाँ धरौटी माग गरेको र उपमेयर राईले सोही दिन धरौटी बुझाएर रिहा भएको अदालतका श्रेस्तेदार सीताराम खड्काले बताउनु भयो ।

अपाङ्ग सेवा सङघका अध्यक्ष उमेशचन्द्र आचार्य र सचिव जयनारायण कटवालको उपमेयर राईविरुद्ध सरकारी वकिल कार्यालय खोटाङमार्फत जिल्ला अदालतमा मुद्दा दर्ता गराउनु भएको थियो । ०८१ साउन ३२ गते जिल्ला प्रहरी कार्यालयमा उजुरी दिएको तर डिएसपी पुरुषोत्तम खड्काले दर्ता गर्न नमानेपछि सरकारी वकिल कार्यालयमा भदौ ४ गते उजुरी दिएको उमेशचन्द्र आचार्यले बताउनु भयो ।

‘हामीले साउन ३२ गते नै डिएसपीलाई जाहेरी दिएका थियौं,’ आचार्यले भन्नुभयो ‘तर लिन नमानेपछि सरकारी वकिल कार्यालयमा दिएका हौं ।’ डिएसपी खड्काले यथेष्ट प्रमाणहरू नभएकाले दर्ता नभएको बताउनु भयो । ‘यसबारेमा यथेष्ट प्रमाणहरू थिएन, यसबारेमा सरकारी वकिलसँग परामर्श लिन सल्लाह दिएको हो, डिएसपी खड्काले भन्नुभयो ।

उजुरी पर्ने थाहा हुनासाथ जिल्ला प्रहरी कार्यालयमा आफैँ गएका उपमेयर राईलाई सरकारी वकिल कार्यालयले भने भदौ ५ गते फरार उल्लेख गरी अदालतमा मुद्दा दायर गरेको अधिवक्ता ओम घिमिरेले बताउनु भयो ।

उक्त मुद्दा दर्ताको विषयमा जिल्ला अदालतका निमित्त श्रेस्तेदार किरणकुमार राई र कानुन व्यवसायीहरू बीच विवाद भएको समेत घिमिरेको भनाइ छ । सरकारी वकिलले कार्यालयले समयभन्दा ढिलो उजुरी ल्याएको र त्यसलाई निमित्त श्रेस्तेदार राईले दर्ता गरेको भन्दै कानुन व्यवसायीहरूले विमति जनाएपछि उक्त उजुरीमा कार्यालय समयभन्दापछि दर्ता गरेको भन्ने शब्द उल्लेख गरेपछि मुद्दा दर्ताको सहमति भएको थियो ।

तारानाथ घिमिरे