समाचारहरू

मायादेवी गाउँपालिका-४ पिपराका वडा अध्यक्ष फत्तेह मोहम्मद मुसलमानका ६ वर्षीय छोरा मृत अवस्थामा भेटिएका छन् । गुलडीहवाको निसवा स्कुल पढ्न जाँदै गर्दा बेपत्ता मोहम्मद ऐमान फागुन ६ गते मृत अवस्थामा भेटिएका हुन् ।

ऐमानको शव आफ्नै घर नजिकैको पोखरीमा भेटिएको प्रहरीले जनाएको छ । मृतक बालकको शरीरमा कुनै चोटपटक भने नलागेको जिल्ला प्रहरी कार्यालय कपिलवस्तुका डिएसपी नरेन्द्र कार्कीले बताए ।

मृतकका बाबु फत्तेहले आफ्नो छोरा हराएको नभई अपहरणमा परेको आरोप लगाउँदै आएका छन् । अपहरणकारीले नै आफ्नो छोराको हत्या गरेको उनको भनाइ छ ।

शवको पोष्टमार्टम फागुन ६ गते नै जिल्ला अस्पताल तौलिहवामा गरी आफन्तलाई बुझाइएको छ । यसैबिच आजै आफन्त तथा गाउँलेले अपहरणकारीको पहिचान गरी कडा कारबाहीको माग गर्दे विरोध प्रदर्शन गरेका छन् ।

नन्दराम पौडेल