समाचारहरू

राजविराज नगरपालिका–१ पडरियाका २३ वर्षीय अजयकुमार दासलाई अपहरण गरी शरीर बन्धक बनाएको आरोप लागेका सोही ठाउँका २७ वर्षीय निजामुद्दिन मियाँ र राजविराज नगरपालिका–८ पानी टंकीका २८ वर्षीय गफार मियाँविरुद्धको मुद्दा जेठ ९ गते मुल्तबीमा राख्ने फैसला भएको छ ।

जिल्ला न्यायाधीश डा. राजेन्द्रप्रसाद आचार्यको इजलासले फरार रहेका आरोपितहरूविरुद्धको मुद्दा मुल्तबीमा राख्ने फैसला गरेको अदालतले जनाएको छ । आरोपितका गाउँलेहरूका अनुसार फरार रहेका आरोपित गफार वैदेशिक रोजगारका लागि कतारमा र निजामुद्धिन कास्कीको पोखरामा रहेका छन् ।

आरोपितहरू सहित राजविराज नगरपालिका–१ पडरियाका २९ वर्षीय रसिद मियाँ र २८ वर्षीय मुस्ताक मियाँले २०७८ असोज १२ गते राति अपहरण गरी शरीर बन्धक बनाएको भन्दै पीडितले जिल्ला प्रहरी कार्यालयमा ०७८ असोज १७ गते उजुरी दिनु भएको थियो ।

राजविराज नगरपालिका–८ कञ्चनरूप रोडको गुलाब ग्यारेजस्थित बाटोमा आरोपितहरूले घेरा हाली हातहतियार देखाई कुटपिट गर्दै गम्छाले मुख छोपी बोल्न, कराउन नदिई ३ सय मिटर दुरीमा रहेको कुखुरा फारम लगी अपहरण तथा शरीर बन्धक बनाएको पीडितले बताउनु भएको थियो ।

उजुरीका साथ पीडितले प्रहरीसमक्ष प्रमाणस्वरूप आरोपितहरूबाट बाँसको खाँबोमा डोरीले बाँधेर पानी खन्याउँदै कुटपिट गरेको भिडिओ पेश गरेका छन् । आरोपितहरूको पञ्जाबाट बल प्रयोग गरी भाग्न सफल भएका पीडितको असोज १३ गते राजविराजस्थित गजेन्द्रनारायण सिंह अस्पतालमा उपचार भयो ।

जिल्ला प्रहरी कार्यालयले ०७८ असोज १७ गते अपहरण तथा शरीर बन्धक उजुरी दर्ता गरेको थियो । आरोपितमध्ये रसिद र मुस्ताक ०७८ कात्तिक २६ गते गिरफ्तार भएका थिए । जिल्ला अदालतमा ०७८ मङ्सिर २० गते अभियोजन पत्र दायर भएकोमा अदालतको आदेशमा आरोपितहरू रसिद र मुस्ताक मङ्सिर २३ गतेदेखि पुर्पक्षका लागि राजविराज कारागारमा थुनामा छन् । अदालतका न्यायाधीश डा. राजेन्द्रप्रसाद आचार्यको जेठ ९ गतेको इजलासले कुटपिट, अंगभंग मुद्दामा परिणत गर्दै रसिद र मुस्ताककालाई १ वर्ष कैद र १० हजार जरिवानाको फैसला गरेको छ । उक्त कैदसजाय अवधि पुरा भएपनि अन्य फौजदारी कसुरमा उनीहरू पुपक्र्षमै रहेकाले कारागारमै थुनामा रहेको कारागार प्रशासनले जनाएको छ ।

मनोहरकुमार पोखरेल