समाचारहरू

१५ वर्षीया भूमिका दुतराज, १५ वर्षीया उषा विश्वकर्मा र १४ वर्षीया डेनी दुतराजलाई अपहरण गरेको आरोपमा प्रहरीले दुई जनालाई गिरफ्तार गरेको छ ।

गोरखा जिल्ला गोरखा नगरपालिका–१० घर भई हाल काठमाडौँ महानगरपालिका–२६ बस्ने २८ वर्षीय विनोद थापा मगरलाई बालबालिकासँगै टोखा नगरपालिकास्थित होटल ब्लू स्टारको कोठा नम्बर ४०४ बाट गिरफ्तार गरिएको प्रहरीले जनाएको छ ।

अपहरणका मुख्य योजनाकार भनिने कैलाली जिल्ला धनगढी घर बताउने हाल काठमाडौँ महानगरपालिका–३१ बस्ने २४ वर्षीय अषिस सिजापतिलाई पनि गिरफ्तार गरिएको प्रहरीले जनायो ।

बालबालिकालाई आरोपितले मङ्सिर ३० गते आमाले बोलाउनु भएको छ भन्दै होटलमा पुर्‍याएको आरोप छ ।

पीडित पक्षले पुस २ गते महानगरीय प्रहरी परिसर टेकुमा उजुरी दिए लगतै बालबालिकाको उद्धार सहित विनोद थापा मगरलाई पुस २ गते नै गिरफ्तार गरिएको महानगरीय प्रहरी परिसरका डिएसपी होविन्द्र बोगटीले जानकारी दिनुभयो ।

‘आरोपित आशिषले बालबालिकालाई भाञ्जाभाञ्जी भनेर बोलाउँथे जसलै गर्दा उनीहरू अपहरणमा परेको थाहा समेत पाएनन् ।’–डिएसपी बोगटीले भन्नुभयो ।

आरोपित आशिषले तीन लाख रुपियाँ फिरौती माग गरेपछि बालिकाहरू अपहरणमा परेको परिवारले चाल पाएको थियो ।

बिमला पौडेल