समाचारहरू

६१ वर्षीय जेष्ठ नागरिकलाई अपहरण गरी शरीर बन्धक गरी डाँका चोरीसमेत गरेको कसुरमा नुवाकोट जिल्ला अदालतले ककनी गाउँपालिका–४ का ३१ वर्षीय राजकुमार तामाङ र तादी गाउँपालिका–५ का २७ वर्षीय राजेन्द्र तामाङलाई जनही १९ वर्ष कैद सजायको फैसला गरेको छ ।

जिल्ला अदालतका न्यायाधीश शुभाषबाबु पुरीको इजलासले भदौ १६ गते कसुर गरेको ठहर गर्दै कैद सजायसँगै जनही १ लाख ९० हजार रुपियाँ जरिवाना, जनही २ लाख रुपियाँ पीडितलाई क्षतिपूर्ति भराउन र पीडित राहत कोषमा जनही ७ हजार ६ सय रुपियाँ दाखिला गराउने फैसला गरेको अदालतकी स्रेस्तेदार खेमकुमार बस्नेतले जानकारी दिनुभयो ।

अपहरण तथा शरीर बन्धकतर्फ ११ वर्ष कैद सजाय र डाँडाचोरीतर्फ ८ वर्ष कैद सजायको फैसला भएको हो ।

कसुरदारहरूले सवारी चालक व्यवसायमा संलग्न ककनी गाउँपालिका–४ का ६० वर्षीय सूर्यबहादुर तामाङलाई ०८० माघ २२ गते राती बिरामीलाई अस्पताल लैजान गाडी लिएर आउन बोलाएर अपहरण गरी रातभरी बन्धक बनाएर माघ २३ गते छाडेका थिए ।

४५ लाख रुपियाँ फिरौती माग गरेकोमा पछि सात लाख रुपियाँ दिने भनेर कसुरदारका मानिसहरूलाई काठमाडौँमा पैसा लिन बोलाएर प्रहरीले गिरफ्तार गरेपछि अपहरित तामाङलाई कसुरदारहरूले छाडेका थिए ।

कसुरदारहरूला२ ०८० माघ २३ र २४ गते गिरफ्तार गरी प्रहरीले मुद्दा चलाएको थियो । यो घटनामा संलग्न भएको आरोप लागेका शिवपुरी गाउँपालिका–८ का २३ वर्षीय चन्द्रबहादुर तामाङ, ककनी गाउँपालिका–८ का ४३ वर्षीय सन्तोष तामाङ, ककनी गाउँपालिका–४ की २६ वर्षीया प्रविता तामाङले भने सफाई पाएका छन् ।

 

नवदीप श्रेष्ठ