समाचारहरू

काठमाडौँ महानगरपालिका-३२ टाउनप्लानिङ्बाट अपहरणमा परेका ११ वर्षीय बालक निशान खड्काको हत्या भएको प्रहरीले जनाएको छ ।

मध्यपुर ठिमी नगरपालिकाको नगदेशस्थित निर्माणाधीन घरभित्र निशानको हत्या गरी शव तीन फिट तल हिलोमा गाडिएको अवस्थामा आज मध्यान्ह शव भेटिएको प्रहरीले बताएको छ ।

बालकको अपहरण गरी अपहरणकारीले ४० लाख रुपियाँ फिरौती माग गरेको बालक खड्काको परिवारले जनाएको छ । बालक खड्का हाइलेन स्कुल काँडाघारीमा कक्षा ६ मा अध्ययनरत रहेका थिए ।

अपराध महाशाखाको टोलीसँगको भिडन्तमा भक्तपुर सुर्यविनायक मन्दिरमाथि रहेको जङ्गलमा दिउँसो संग्दिग्ध अपहरणकारीसँग भिडन्त भएको थियो ।

अपहरणकारी खोज्दै गएको महाशाखाको टोलीमाथि उनीहरूले गोली प्रहार गरेपछि प्रहरीले जबाफी फायर गर्दा दुई जना संग्दिग्ध अपहरणकारी मारिएको महानगरीय प्रहरी परिसर भक्तपुरका एसपी हिमालयकुमार श्रेष्ठले बताए ।

भिडन्तमा मारिनेमा सिन्धुपाल्चोक कार्यथलीका २३ वर्षीय गोपाल तामाङ र नुवाकोट सामरीका २४ वर्षीय अजय तामाङ रहेको महागरीय प्रहरी परिसर भक्तपुरका एसपी श्रेष्ठले बताए ।

घटनास्थलबाट प्रहरीले एक थान पेस्तोल, दुई राउण्ड गोली र अपहरण पश्चात फिरौती रकम माग गरिएको सिम प्रयोग गरिएको मोबाइल बरामद गरेको जनाएको छ ।

सविना केसी