समाचारहरू

अपहरणमा परेका ६ वर्षीया बालिकालाई ०८१ जेठ २१ गते इलाका प्रहरी कार्यालय, ईश्वरपुर, सर्लाहीको सहयोगमा उद्धार गरिएको छ । उद्धारपछि बालिकालाई महोत्तरी जिल्ला प्रहरीले परिवारको जिम्मा लगाएको छ ।

बालिकालाई गौशाला नगरपालिका-१० बटुवाका ५८ वर्षीय लालबाबु मण्डलले जेठ २० गते अपराह्न घरबाटै अपहरण गरी डरत्रास देखाई आफ्नो घरमा राखेका थिए । त्यस्तै, बालिकाका आफन्तले बालिकाको खोजतलासका लागि इलाका प्रहरी कार्यालय गौशालालाई जानकारी गराएपछि मण्डलले बालिकालाई जेठ २१ गते बिहान सर्लाहीको ईश्वरपुर नगरपालिका-५ का वडा सदस्य जलेश्वर राम महराको घरमा लगेका थिए ।

यता वडा सदस्य महरालाई मण्डलमाथि शङ्का लागेपछि सोही दिन इलाका प्रहरी कार्यालय, ईश्वरपुरलाई जानकारी गराएका थिए । जानकारी लगत्तै प्रहरीले पीडित बालिकाको उद्धार गरी परिवारजनको जिम्मा लगाएको छ भने मण्डललाई नियन्त्रणमा लिएको इलाका प्रहरी कार्यालय गौशालाले जनाएको छ । साधुको भेषमा आएका मण्डलले अपहरण गरी डरत्रास देखाउनुका साथै कुटपिट गरेको पीडितले बताउनु भयो ।

त्यस्तै, बालिकालाई अपहरण गर्नुको कारण स्पष्ट हुन नसकेको र घटनाको थप अनुसन्धान भइरहेको जिल्ला प्रहरी कार्यालयका डिएसपी नकुल पोखरेलले जानकारी दिनु भयो ।

बालिकाको स्वस्थ्य परिक्षण जेठ २१ गते प्रादेशिक अस्पताल जलेश्वरमा गरिएको छ ।

ममता विश्वकर्मा