समाचारहरू

अन्त्तरजातीय विवाह गरेको आरोपमा दुई जना महिलाले आफ्नै बावुबाट नागरिकता बनाउन बाट वञ्चित हुन परेको छ ।

दलित युवासँग अन्तरजातीय विवाह गरेकै आरोमा खत्याड गाउँपालिका-४ की २२ वर्षीया लक्ष्मि थापा र सोही वडाकी ३० वर्षीया सुशीला थापालाई दलित युवासँग विवाह गरेको आरोपमा नागरिकता बनाउँदा चाहिने आवश्यक कागजपत्र आफ्नै बावुले नदिँदा नागरिकता बनाउन नपाएको पीडित पक्षले जनाएको छ ।

खत्याड गाउँपालिका-४ का ६ जना र ८ की एक जना क्षेत्री युवतीले दलित युवासँग प्रेम विवाह गरेका छन् ।

छायाँनाथ रारा नगरपालिका-४ का चार जना क्षेत्री युवाले दलित युवतीसँग विवाह गरेका छन् ।  सोही नगरपालिका-५ की एक क्षेत्री युवतीले सोही वडाका दलित युवासँग र सोरु गाउँपालिका-१ की शाही युवतीले दलित युवासँग विवाह गरेका छन् ।

त्यसैगरी सोही नगरपालिका-५ की क्षेत्री युवतीले सोही गाँउका दलित युवासँग अन्तरजातीय विवाह गरेको लामो समय भई सन्तान जन्मिसक्दा समेत उनीहरूकै बावु आमाले तिरष्कृत गर्ने गरेका र अहिलेसम्म दुई जनाले नागरिकता बनाउनबाट वञ्चित भएको दलित अधिकारकर्मी धिरज नेपालीले बताएका छन् ।

खत्याड गाउँपालिका-४ चिमाडुग्रीकी लक्ष्मि थापाले सोही वडाको हिगोटी गाँउका पुरन बिकसँग विवाह गरेको तीन वर्षभयो । उनीहरूबाट एक छोरी जन्मेको एक वर्षभइसक्दा समेत उनका बावु आमाले कुनै वास्ता गरेका छैनन् ।

दलितसँग विवाह गरेकै कारण अहिलेसम्म नागरिकता बनाउन पाएकी छैनन् । 'नागरिकता बनाउन जाँदा माइती पक्षको नागरिकता चाहिने रहेछ । बाबालाई नागरिकता बनाइदिनु पर्‍यो भनेर खबर पठाउँदा आमाबावु दुवैले दलितसँग विवाह गरेको भन्दै नानथरी गाली गर्ने गरेकाले अहिलेसम्म नागरिकता बनाउन पाएकी छैन ।'-उनले भनिन् ।

'सरकारी तथा गैरसरकारी संस्थाले गाउँमा बनाउने आमा समूह तथा अन्य कुनै समूहमा सहभागी हुनलाईसमेत नागरिकता चाहिने भन्छन् । तर, बाबालाई नागरिकता बनाइदिनु भन्दा दलितको पत्नी हो मेरो छोरी होइन भन्दै गाली गर्ने गरेकाले नागरिकता बनाउन सकिएको छैन । अन्तरजातीय विवाह गरेकै कारण बावु आफूले यस्तो पीडा भोग्नु पर्‍यो ।'-लक्ष्मि थापाले गुनासो गरिन् ।

यत्रो समस्या हुँदाहुँदै पनि कसैले लिखित तथा मौखिक जानकारी कार्यालयमा नदिएको बताउँदै खत्याड गाउँपालिकाका अध्यक्ष उब्जन शाहीले यो विषयमा कार्यालयमा जानकारी दिए गाउँपालिकाको न्यायिक समितिमा राखेर छलफल गरी आवश्यक कारबाही अगाडि बढाउने बताए ।

जीवन सेजुवाल