समाचारहरू

जिल्ला बाल क्लब सञ्जाल, सप्तरीले राजविराजमा मङ्सिर ४ गते अन्तर्राष्ट्रिय बाल अधिकार दिवस मनाएको छ ।

स्थानीय हरिनन्देश्वर महादेव मन्दिरको प्राङ्गणबाट निक्लिएको बालबालिका र सरोकारवालाहरूको जुलुशले नगरपरिक्रमा गर्दै प्रभातफेरी गरेको छ । निर्वाचनमा बालबालिकाको प्रयोग नगरौँ, बालबालिकालाई विद्यालय पठाऔँ, बालश्रम र बालविवाह अन्त्य गरौँ जस्ता नारासहित नगरपरिक्रमा गरेपश्चात हरिनन्देश्वर महादेव मन्दिरको प्राङ्गणमै पुरस्कार वितरण र सभाको आयोजना भयो ।

सन् १९८९ नोभेम्बर २० मा संयुक्त राष्ट्र सङ्घले बाल अधिकारसम्बन्धी महासन्धि पारित गरेको हुनाले हरेक वर्ष नोभेम्बर २० का दिन अन्तर्राष्ट्रिय बाल अधिकार दिवस मनाउने गरिएको छ ।

नेपालले संयुक्त राष्ट्रसङ्घीय बाल अधिकारसम्बन्धी महासन्धिलाई सन् १९९० मा हस्ताक्षर गरेको थियो । नेपालले बाल अधिकारसम्बन्धी महासन्धिमा हस्ताक्षर गरेर आफ्नो प्रतिबद्धता पूरा गरेपनि बाल अधिकारको अवस्थामा भने सोचेजस्तो परिवर्तन देखाउन सकेको छैन ।

मनोहरकुमार पोखरेल