समाचारहरू

अर्वेनी गाविस-५ का ८१ वर्षीय लालबहादुर सुनारले सोही स्थानकी ४२ वर्षीया सावित्रा न्यौपानेसँग प्रेम सम्बन्ध राखेको आरोपमा स्थानीयले दुवै जनालाई गाउँ निकाला गरेका छन् ।

पुस १ गते लालबहादुरको घरमा बसेको अवस्थामा सावित्रालाई भेटाएपछि स्थानीयले उनीहरूलाई बाँधेर निर्घात कुटपिट गरी गाउँ निकाला गरेको पीडित पक्षको आरोप छ ।

अर्वेनी गाविस कार्यालय सहायक झविलाल न्यौपाने र सावित्राका ४३ वर्षीय भतिज चिन्तामणी न्यौपानेको अगुवाइमा करिव १ सय ५० जना स्थानीयले एक्कासी उनीहरू दुवै जनालाई गाउँ निकाला गरेको पीडित लालबहादुरका ३७ वर्षीय छोरा अनुज सुनारले बताए ।

गाउँ निकालाको कागजमा दुवै जनालाई जबरजस्ती औँठा छाप गर्न लगाई गाउँ निकला गरिएको उनले बताए ।

पीडित सुनार कुटाई खाएको पाचौँ दिनसम्म पनि हिँड्न नसक्ने अवस्थामा रहेको पीडितका छोरा अनुजले बताए । उनको गोडामा लाठी प्रहारका कारण बनेका निल डामहरू रहेको पनि उनले बताए ।

उनीहरू दुवैलाई बाँधेर कुटपिट गर्दै गाउँ डुलाएर गाविसमा पुर्‍याई गाउँ निकाला गर्ने कागजी निर्णय गराएको स्वयम् चिन्तमणी न्यौपानेले स्वीकार गरे । उनले भने-'आफूले मात्र नभएर गाउँका सय-ढेढ सय जनाले गाउँ निकाला गर्ने निर्णय गरेको हो ।'

पीडित लालबहादुरको घर पनि भत्काइएको पीडित पक्षको आरोप छ । स्थानीयको ठूलो समूहले धम्क्याउँदै जलाउँ कि भत्काउँछस भनेपछि आफूले उनीहरूकै आँखा अगाडि घर भत्काउन बाध्य भएको उजुरी दिन सदरमुकाम आएका छोरा अनुजले बताए ।

गाउँलेको डरले वन पसेका पीडित दुवै जनालाई उनका छोरा र आफन्तजनले दुई दिनपछि घरदेखि धेरै टाढाको बिच जङ्गल र अनकन्टार भिरमा भेटाएका थिए । दुई दिन दुई रात सम्म जंगलमा बसेका उनीहरूलाई त्यहाँका दलितहरूले गाउँ फर्काए पनि बस्ने बास र खाने गास नहुँदा ती दुवै विचल्लीमा परेका छन्  ।

गाउँ निकलाको निर्णय सुनाउँदै मलाई हस्ताक्षर गर्न लगाएका हुन् विकले भने-'त्यत्रो गाउँ घोप्टिएपछि म बोल्न सक्ने कुरै भएन हस्ताक्षर गर्न बाध्य भएँ ।'

घटनाका बारेमा प्रमुख जिल्ला अधिकारी कृष्णप्रसाद ढुङ्गानाले पीडित पक्षले जाहेरी दिए घटनाको सत्य तथ्य बुझेर दोषी ठहरिए कारबाही हुने बताए । जिल्ला प्रहरी प्रमुख एसपी भोलाबहादुर रावलले तत्काल पुर्तिघाट प्रहरी चौकीलाई घटनाको बारेमा सत्य तथ्य बुझ्न पठाएकाले बुझेर कारबाही गर्ने बताए ।

टोपलाल अर्याल