समाचारहरू

नीलकण्ठ नगरपालिका-३ धादिङबेसी स्थित नीलकण्ठ बहुमूखी क्याम्पस र नीलकण्ठ उच्च माविमा नेत्रविक्रम चन्द 'विप्लव' नेतृत्वको नेकपाको भातृ सङ्गठन अनेरास्ववियू क्रान्तिकारीका विद्यार्थी कार्यकर्ताले जेठ २१ गते विद्यालयमा आक्रमण गर्दा एक विद्यार्थी घाइते भएका छन् ।

५/६ जनाको समूहले विद्यालयमा ढुङ्गामुढा गरी आक्रमण गरेको थियो । आक्रमणबाट कक्षाकोठाभित्र रहेकी स्नातक तह प्रथम वर्षमा अध्ययनरत १९ वर्षीया कविता श्रेष्ठ घाइते भएको क्याम्पस प्रमुख नवराज शर्माले बताए ।

क्याम्पसमा परीक्षा सञ्चालन भइरहेको र पठनपाठन समेत भइरहेको बेला आक्रमण भएको थियो । आक्रमणबाट दुई थान कम्प्यूटर, तीन थाप प्रिन्टर, दुई थान कूर्सी, एक थान टेलिफोन सेट, आठ ओटा झ्यालका सिसा फुटेर क्षति पुगेको क्याम्पस प्रशासनले जनाएको छ ।

घटनापछि नीलकण्ठ क्याम्पस बन्द गरिएको छ । सो सङ्गठनले मूल्य वृद्धिको विरोधमा शैक्षिक हड्तालको आह्वान गरेको थियो ।

सीताराम अधिकारी