समाचारहरू

संयुक्त लोकतान्त्रिक मधेसी मोर्चाका कार्यकर्ताहरूले राजविराज नपा-१ मा रहेको जिल्ला वन कार्यालय र राजविराज नपा-८ मा रहेको क्वाटरमा फागुन २४ गते आगजनीको प्रयास गरेका छन् ।

उनीहरूले राजविराज नपा-१ स्थित नेपाल दुरसञ्चार कार्यालय र नगरपालिका कार्यालयमा ढुङ्गा प्रहार गरी झयालका सिसा फुटाएका छन् भने राष्ट्रिय बाणिज्य बैङ्कमा ढुङ्गा र पेट्रोल बम प्रहार गरेको प्रहरीले जनाएको छ ।

यसैगरी राजविराज नपा-८ स्थित प.बि. बिद्यालय अगाडि सडकमा सशस्त्र प्रहरी सवार स.१प ५८४४ नम्बरको मोटरसाइकलमा आगजनी गरेका छन् ।

प्रदर्शनकारीले भारदह गाविस-१ कोशी व्यारेजस्थित सशस्त्र प्रहरीको चेक पोस्टमा समेत आगजनी गरेर नष्ट गरेका छन् । मोर्चाका कार्यकर्ताले अधिवक्ता सुजित पोखरेललाई राजविराज नपा-१ स्थित अदालत अगाडि रहेको उनको ल र्फम अगाडि मोसो दलेर भागेको पोखरेलले बताए ।

त्यसैगरी संयुक्त लोकतान्त्रिक मधेसी मोर्चाका कार्यकर्ताले नेकपा एमालेको आमसभास्थल रहेको बसविट्टी गाविसस्थित गजेन्द्रनारायण सिंह औद्योगिक क्षेत्रमा फागुन २४ गते तोडफोड र आगजनी गरेका छन् ।

आमसभाका लागि बनाइएको मञ्चमा बाँकी रहेका सामग्रीहरू लैजानुका साथै उनीहरूले मिलन डेरी उद्योगमा ढुङ्गा प्रहार गरी सिसाहरू फुटाएका छन् । दिउँसो औद्योगिक क्षेत्रको कार्यालय प्रमुखको कार्यकक्षमा आगजनी गरेका प्रदर्शनकारीले साँझ उनको निवासमा आगजनी गरेका छन् ।

कार्यालय प्रमुख सञ्जय थापा फागुन २४ गते नै हेटौँडा पुगेका छन् । औद्योगिक क्षेत्रको मुल गेट अगाडि बम जस्तो देखिने दुई थान शङ्कास्पद वस्तु र ७ दशमल ६२ को तीन राउण्ड गोली फेला परेको सुरक्षा श्रोतले जनाएको छ ।

इन्सेक धनुषा जिल्ला प्रतिनिधि विनोदकुमार रविदासका अनुसार संयुक्त लोकतान्त्रिक मधेसी मोर्चाका कार्यकर्ताहरूले मिथिला विदेह क्षेत्र पर्यटन प्रवर्धन विकास समितिको कार्यालयमा फागुन २४ गते आगजानी गरेका छन् ।

उनीहरूले साँझ ७ बजे पर्यटन कार्यालयमा पेट्रोल बम प्रहार गरी आगजनी गरेको जिल्ला प्रहरी कार्यालयका एसपी लालमणि आचार्यले बताए । कार्यालयको दुई थान सोफा सेट, टेवल र कुर्सी जलेर क्षति पुगेको पनि प्रहरीले जनाएको छ ।

मोर्चाका कार्यकर्ताले ढुङ्गामूढा प्रहार गरेपछि कार्यालयको झ्यालढोकामा पनि क्षति पुगेको प्रहरीले जनाएको छ ।

मनोहरकुमार पोखरेल