समाचारहरू

गोरखा फुजेलका कृष्णप्रसाद अधिकारीको हत्या प्रकरणका जाहेरवाला नुरप्रसाद अधिकारीको घरमा म्याद तामेल गरिएको छ ।

गोरखा अदालतका तामेलदार टेकबहादुर वली र टीकाराम थापाले साउन २३ गते बेलुका फुजेल पुगेर अधिकारीको वर्षौँदेखि बस्न छाडेको जीर्ण घरको दैलोमा म्याद टाँस गरी फर्किएको गोरखा अदालतका श्रेष्तेदार गोविन्द आचार्यले जानकारी दिए । जाहेरवाला नुरप्रसाद अधिकारीलार्ई भदौ ४ गते सोमबारका लागि बकपत्र गर्न अदालतले गत साउन २० गते आदेश गरेको छ ।

गण्डकी गाउँपालिका–३ का वडाअध्यक्ष नवराज श्रेष्ठले वडा कार्यालयमा पनि म्याद तामेल भएको कागजमा रोहवरको रूपमा हस्ताक्षर गरेका छन् । यसअघि फुजेल गाउँमा रहेको चौताराको पिपलबोटमा म्याद तामेल भएको थियो ।

यसअघि भएको म्याद तामेलीबाट बकपत्रका लागि नुरप्रसाद नआएपछि उनको नामको म्याद पुन तामेल जारी गर्ने आदेश भएको हो । अदालतले नबुझी नहुने भनेको जाहेरवालाको अनुपस्थितिमै फैसला गर्न लागिएको भन्दै जाहेरवाला पक्षका वकिलहरूले आपत्ति प्रकट गरेपछि पुनः म्याद तामेल जारी गर्न न्यायाधीश कुलप्रसाद शर्माबाट आदेश भएको हो ।

छाडेको घरमा म्याद तामेली

नुरप्रसादको परिवार ०६४ पुस १० गते नै गाउँ छाडेर गोरखा सदरमुकाम बसाइ सरेको थियो । तर, गोरखा अदालतका तामेलदारहरूले सोही घरमा पुगेर म्याद टाँसेर फर्केका छन् । यो परिवारले फुजेलको घर छाडेको १० वर्ष भइसकेको छ ।

गङ्गामायाद्वारा १० दिनका लागि अनशन स्थगित

०७० सालदेखि काठमाडौँमा बाबु आमा अनशनरत रहँदा नुरप्रसाद भने सोही समयदेखि सम्पर्कविहीन रहँदै आएका थिए । ढुङ्गामाटोको गारो र जस्ताले छाएको २ तले घर रहेको छ । त्यो पनि भूकम्पले क्षति पुगेको स्थानीयहरूले बताएका छन् । बसाइ सरेर हिँडेको घरमा म्याद तामेल भएपछि पुनः म्याद तामेलको विषयमा जाहेरवालाले अनभिज्ञता देखाउन सक्ने वकिलहरू बताउँछन् ।

म्याद तामेलीले खायो ६ महिना

०७४ फागुन १३ गते आइतबार न्यायाधीश कुलप्रसाद शर्माको इजलासले यस मुद्दाका जाहेरवाला नुरप्रसाद अधिकारीलाई बकपत्रका लागि अदालतमा हाजिर हुन आदेश गरेको थियो ।

मुलुकी ऐन २०२० को अदालती बन्दोबस्तको ११५ अनुसार ‘नबुझी नहुने’ भन्दै नुरप्रसादलाई आगामी चैत २५ गते आइतबार अदालतमा बकपत्रका लागि हाजिर हुन आदेश गरेको थियो । तर, उनी अझैसम्म अदालत हाजिर भएका छैनन् ।

फुजेल हत्याकाण्डका मुख्य आरोपितद्वारा सर्वोच्चमा आत्मसमर्पण, लगत्तै जेल चलान

फागुनदेखि साउन सकिँदासम्म दुई पटक म्याद तामेल भएको छ । म्याद तामेलीकै कारण ६ महिना मुद्दा लम्बिएको छ ।

०६१ जेठ २५ गते प्रहरीमा परेको कृष्णप्रसाद अधिकारी हत्या मुद्दा ०७० सालमा पुनः व्युँझाइएको थियो । २२ पटक पेशी सरेपनि मुद्दा टुङ्गिन सकेको छैन ।

भाइ कृष्णप्रसाद अधिकारीको हत्या गाउँकै १३ जनाको मिलेमतोमा भएको भनी जाहेर दिएका व्यक्ति नुरप्रसाद साउन २० गते आइतबार बिहान ललितपुरमा फेला परेका छन् । त्यसपछि उनी आमाको सम्पर्कमासमेत पुगिसकेका छन् ।

०६१ जेठ २४ गते कृष्णप्रसादका बुवा नन्दप्रसाद अधिकारीले आफ्नो छोराको हत्या भएको भन्दै जिल्ला प्रहरी कार्यालय, चितवनमा उजुरी दिएका थिए । त्यसको १ वर्ष ६ महिनापछि कृष्णप्रसादका दाजु नुरप्रसादले १३ जनाविरूद्ध किटानी जाहेरी दिएका थिए । ०६१ जेठ २४ गते अपहरण पछि अधिकारीको हत्या गरिएको जनाइएको छ ।

दिपेन्द्र अधिकारी