अधिकारकर्मीद्वारा स्वास्थ्यमन्त्री थापाको ध्यानाकर्षण

  ०७३ कात्तिक ३० गते

इन्सेकसम्बद्ध मानव अधिकार निगरानी समूह कास्की र शान्तिका लागि नागरिक समाजको सञ्जाल पोखराले मणिपाल मेडिकल कलेजका विद्यार्थीहरूको पठनपाठन अवरुद्ध भएकोलगायत समग्र मुलुकभरिको स्वास्थ्यसम्बन्धी सवाललाई लिएर स्वास्थ्य तथा जनसङ्ख्या मन्त्री गगन थापाको ध्यानाकर्षण गराएका छन् ।

कात्तिक २९ गते सञ्जाल र निगरानी समूहको एक टोलीले स्वास्थ्य तथा जनसङ्ख्या मन्त्री गगन थापालाई पोखरामा भेटेर सरकारको स्वास्थ्य नीति तथा कार्यक्रमहरू व्यवहारमा कार्यन्वयन हुन नसक्दा सेवाग्राहीहरू मर्कामा परेको जानकारी गराएका थिए ।

सञ्जालका संयोजक ढाकाराम पौडेलले सरकारबाट निशुल्क रूपमा दिइने औषधि पूर्ण रूपमा समयमा उपलब्ध गराउनु पर्ने बताए । स्वास्थ्य चौकीमा आवश्यकता अनुसारको औषधि र अनिवार्य चिकित्सकको व्यवस्था गर्न उनले माग गरे । मानव अधिकार निगरानी समूहका संयोजक पदमराज पहारीले स्वास्थ्यसम्बन्धी शिक्षालाई सर्वसुलभ बनाउन आग्रह गरे ।

१३ बुदे ध्यानाकर्षण पत्रमा स्वास्थ्य निकायको नियमित अनुगमन गर्न, ज्येष्ठ नागरिकको निशुल्क उपचारको व्यवस्था गर्न माग गरिएको छ । चिकित्सकहरूले मनपरि ढङ्गले शुल्क लिइरहेकोले सोको नियन्त्रण र नियमन गर्न माग गर्दै स्वास्थ्यसम्बन्धी शिक्षा र सचेतना अभियानलाई जनस्तरसम्म पुर्‍याउन माग गरिएको छ ।

मन्त्री थापाले निशुल्क औषधि खरिदका लागि भएका व्यवहारिक कठिनाइहरू हल हुँदै आएको बताए । उनले ध्यानाकर्षण पत्रमा समावेश गरिएका सुझावहरूलाई सरकारको तर्फबाट पुरा गर्ने प्रतिवद्धतासमेत व्यक्त गरे ।


इन्सेक पश्चिमाञ्चल क्षेत्रीय कार्यलय, पोखरा