समाचारहरू

उमेर नपुगी विवाह गर्न लागेको भन्दै मानव अधिकारकर्मीहरूको सक्रियतामा कास्कीमा एउटा बालविवाह रोकिएको छ । लेखनाथ नपा-१५ कोठेगाउँमा माघ १८ गते हुन लागेको एउटा बालविवाह मानव अधिकारकर्मीहरूको परामर्शपछि रोकिएको हो ।

लेखनाथ नपाकी १५ वर्षीया बालिका र म्याग्दी जिल्ला सिंगा नपा-१५ का १९ वर्षीय अशोक बिकको विवाह हुन लागेपनि मानव अधिकारकर्मीहरूको एक टोली विवाह स्थल पुगेर बेहुली पक्षलाई परामर्श दिएपछि बाल विवाह रोकिएको लेखनाथ-१५ स्थित बालमञ्चकी अध्यक्ष प्रतिभा अधिकारीले जानकारी दिइन् ।

अधिकारीले  बेहुलीको उमेर १८ वर्षपुगेपछि विवाह गर्ने सहमतिमा बालविवाह रोकिएको र बेहुला पक्ष बेहुली नलिएरै फर्किएको बताइन् । बाल अधिकारकर्मी टोली संस्था, लेखनाथ नगरपालिका प्रतिनिधि, सञ्चारकर्मी, सुरक्षाकर्मी, नागकि समाज, नारी सचेतना केन्द्रका प्रतिनिधिको सक्रियतामा विवाहको उमेर पुगेपछि विवाह गर्ने शर्त सहितको सहमतिपत्रमा दुवै पक्षले हस्ताक्षर गरेपछि बेहुला पक्ष फर्किएका थिए ।

इन्सेक पश्चिमाञ्चल क्षेत्रीय कार्यलय, पोखरा