समाचारहरू

छाँयानाथ रारा नपा-७ की २८ वर्षीया चुनमती शाही जिल्ला अदालत मुगुमा बहुविवाहको तारेख बुझाउन जाँदै गरेको अवस्थामा जेठ २८ गते २३ वर्षीया सौता उब्जीता सिंहले कुटपिट गरेको पीडितले आरोप लगाइन् ।

जिल्ला अदालतमा तारेख बुझाउन जाँदै गर्दा गमगढी बजारको मिलन चोकमा सौता सिंहले कुटपिट गरेको चुनमतीले बताइन् ।

ढुङ्गाले टाउकोमा प्रहार गरेपछि घाइते भएकी चुनमतीको टाउकोमा आठ ओटा टाँका लगाइएको छ । घाइतेको स्थानीय औषधि पसलमा उपचार भएको पति गोर्खराज शाहीले बताए ।

उब्जीता सिंह घरमा हुँदाहुँदै २६ वर्षीय शाहीले सोही ठाउँकी २८ वर्षीया चुनमती कुलालसँग ०७३ कात्तिक ७ गते बहुविवाह गरेका थिए । ०७३ मङ्सिर १ गते आफू माथि सौता ल्याएको आरोपमा उब्जीताले पति गोर्ख र चुनमतीविरुद्ध जिल्ला प्रहरी कार्यालयमा बहुविवाहको उजुरी दिएकी थिइन् । मङ्सिर २३ गते जिल्ला अदालतको आदेश अनुसार दुवै जना ५१/५१ हजार रुपियाँ धरौटीमा रिहा भएका थिए ।

जिल्ला अदालतमा बहुविवाहसम्बन्धी मुद्दा दर्ता भएपछि बेलाबेला तारेख बुझाउन जानुपर्ने चुनमतीले बताइन् ।

जीवन सेजुवाल