अत्यधिक रक्तश्रावका कारण सुत्केरीको मृत्यु

  ०७९ माघ २१ गते

सोताङ गाउँपालिका–५ की ३० वर्षीया गंगा बस्नेतको अत्यधिक रक्तश्रावका कारण मृत्यु भएको जिल्ला अस्पतालले जनाएको छ ।

माघ १९ गते सोताङ प्राथामिक अस्पतालमा अप्रेशनमार्फत छोरालाई जन्म दिनु भएकी बस्नेतको रक्तश्राव नरोकिएपछि रगत अभावमा मृत्यु भएको जिल्ला अस्पताल फाप्लुका डाक्टर अजय चौधरीले बताउनु भयो ।

अप्रेशनपछि तत्काल नै रगत चाहिएको भएपनि रगत अभाव पश्चात सोताङ प्राथामिक अस्पतालले जिल्ला अस्पताल फाप्लु रेफर गरेको थियो ।

जिल्लाका कुनै पनि अस्पतालमा ब्लड बैंक नभएका कारण सुत्केरीलाई तत्काल रगत चाहिएमा उपलब्ध गराउन नसकिने डाक्टर चौधरीले बताउनु भयो ।

माघ १९ गते बिहान १० बजे सुत्केरीलाई जिल्ला अस्पतालमा ल्याइएको भएपनि उहाँको मुत्यु भइसकेको डाक्टर चौधरीले बताउनु भयो ।

शिशुको अवस्था सामान्य छ ।

सोताङ गाउँपालिका–५ मा माघ २० गते शवको सद्गत गरेको पीडितका भाई विष्णु बस्नेतले बताउनु भएको छ ।

नेपालको संविधानको धारा ३५ मा स्वास्थ्यसम्बन्धी हकको व्यवस्था गरेको छ ।

सोही धाराको उपधारा १ मा प्रत्येक नागरिकलाई राज्यबाट आधारभूत स्वास्थ्य सेवा निःशुल्क प्राप्त गर्ने हक हुनेछ र कसैलाई पनि आकस्मिक स्वास्थ्य सेवाबाट वञ्चित गरिने छैन भन्ने उल्लेख छ ।


अञ्जु कार्की