समाचारहरू

अनौपचारिक क्षेत्र सेवा केन्द्र (इन्सेक) ले असार १ गते हेटौँडामा आयोजना गरेको भूकम्पपीडितहरूको राहत र पुनर्निर्माणको अवस्था विषयक सार्वजनिक सुनुवाइ कार्यक्रममा नेपाल राष्ट्रिय पुनर्निर्माण प्राधिकरणको जिल्ला आयोजना कार्यान्वयन इकाईका प्रमुख पुष्पराज अधिकारीले ७ हजार ८ सय ३७ लाभग्राहीहरूसँग अनुदान सम्झौता नै हुन नसकेको बताएका छन् ।

'अनुदान सम्झौता हुन नसकेपछि उनीहरूलाई किस्ता पनि उपलब्ध गराउन सकिएको छैन ।'-उनले भने ।

सार्वजनिक सुनुवाइ कार्यक्रममा कार्यालय प्रमुख अधिकारीले जिल्लाका ७ हजार भन्दा बढी भूकम्पपीडितहरूको आफ्नो नाममा एक धुर पनि जमीन नभएकाले सम्झौता हुन नसकेको बताए ।

उनीहरू वर्षौँदेखि ऐलानी जग्गामा बस्दै आएका छन् । राष्ट्रिय पुनर्निर्माण प्राधिकरणले आफ्नो नाममा जग्गा नभएकाहरूसँग अनुदान सम्झौता नगर्ने नीति लिएकाले ऐलानी जग्गामा बस्ने भूकम्पपीडितहरूले उक्त समस्या व्यहोर्नु परेको हो ।

राष्ट्रिय पुनर्निर्माण प्राधिकरण हेटौँडा इकाईका प्रमुख अधिकारीका अनुसार मकवानपुरमा ३० हजार २ सय ३८ लाभग्राही छन् । तीमध्ये २२ हजार ४ सय १ लाभग्राहीसँग सम्झौता भएको छ । २१ हजार ६ सय ३३ लाभग्राहीले पहिलो किस्ताको अनुदान रकम लगिसकेका छन् ।

१ हजार ३९ लाभग्राहीले दोस्रो किस्ताको अनुदान रकम पनि बुझेर लगिसकेको राष्ट्रिय पुनर्निर्माण प्राधिकरण हेटौडा इकाईका प्रमुख अधिकारीले बताए । उनले भने-'गैरसरकारी संस्थाले ३ सय २७ लाभग्राहीलाई तेस्रो किस्ता पनि दिइसकेका छन् ।'

मकवानपुरका २६ हजार ९ सय ६८ जनाले गुनासो दर्ता गराएका थिए । तीमध्ये स्थानीय तह र पुनर्निर्माण प्राधिकरणबाट १९ हजार ७ सय गुनासाहरूको सुनुवाइ भइसकेको छ । अझै ४ हजार भन्दा बढी गुनासाहरूको सुनुवाइ हुन बाँकी रहेका छन् ।

प्रताप विष्ट