अज्ञात समूहद्वारा राज्यमन्त्री खड्काको घरमा बम बिष्फोट

सहकारी तथा गरिबी निवारण राज्यमन्त्री एवम् नेपाली काङ्ग्रेसबाट बागलुङ क्षेत्र नम्बर १ मा प्रतिनिधि सभा सदस्य उम्मेदवार चम्पादेवी खड्काको घरमा मङ्सिर ४ गते राति बम बिष्फोट भएको छ ।

बागलुङ बजारको लालीगुराँस चोकस्थित राज्यमन्त्री खड्काको घरमा रातको ११ बजे बम बिष्फोट भएको जिल्ला प्रशासन कार्यालयले जनाएको छ ।

बम विष्फोटबाट कुनै मानवीय क्षति नभएपनि घरको भूइँतलामा सामान्य क्षति पुगेको छ । बागलुङ जिल्लाका प्रमुख जिल्ला अधिकारी विष्णुबहादुर थापाले जिल्लाको समग्र सुरक्षाको लागि नेपाली सेना, सशस्त्र प्रहरी र नेपाल प्रहरीलाई परिचालन गरिएको भन्दै निर्वाचनको समयमा ढुक्क भएर मतदान गर्न आग्रह गरेका छन् ।

प्रमुख जिल्ला अधिकारी थापाले खड्काको घरमा बम विष्फोट गराउने पक्षको खोजी कार्य जारी रहेको बताउँदै जिल्लामा जनतालाई शान्ति सुरक्षाको प्रत्याभुतिका लागि सुरक्षाका सबै संयन्त्र तैनाथ रहेको बताए ।


सिर्जना पन्त