समाचारहरू

अज्ञात समूहले वैशाख २६ गते कालिका प्यासेफिक जेभीको एउटा जेसिबी डोजरमा आगजनी गरेको छ । इस्मा गाउँपालिका-२ को रातचौरमा बिहान एक बजेतिर उक्त डोजरमा आगो लगाएको प्रहरीले जनाएको छ ।

२०५ नम्बरको जेसिबीले छल्दी-पनाहा-इन्द्रेगौडा सडकखण्डमा काम गरिरहेको ठेकेदार भरत कटुवालले जानकारी दिए । आगजनीबाट जेसिबी पुरै जलेर नष्ट भएको उनले बताए । उक्त डोजर जलेपछि मात्र थाहा पाएकाले कसले र किन लगाएको भन्नेबारे जानकारी नभएको कटुवालले बताए ।

'कसैसँग रिसइबी थिएन ।'-उनले भने-'अचानक घटना घट्यो ।' काम समयमै सक्ने गरी भइरहेको बेलामा उपकरण नै जलेपछि समस्या भएको उनको प्रतिक्रिया छ । त्यो सडक खण्डमा मात्र दुई ओटा जेसिबी रहेको उनले बताए ।

जिल्ला प्रहरी कार्यालय गुल्मीका डिएसपी महेन्द्र नेपालले घटना घटाउनेहरूको खोजी कार्य जारी रहेको बताए । ठेकेदारहरूले धेरै जसो सडकहरूमा जेसिबीहरू बाटोमै राखेर लापरबाही गर्ने गरेको उनको प्रतिक्रिया छ । 'ठेकेदार र सञ्चालकहरू आफूले पनि निगरानी र सजकता अपनाउन पर्‍यो ।'-उनले भने-'समस्या परेपछि मात्र पछुताउने प्रवृत्ति छ ।' घटना स्थल नजिकै रहेको हस्तिचौर प्रहरी चौकीले घटनाको अनुसन्धान गरिरहेको डिएसपी नेपालले जानकारी दिए ।

टोपलाल अर्याल