अज्ञात पक्षद्वारा गोली प्रहार गरी एक युवकको हत्या

कमला नगरपालिका–८ का २५ वर्षीय राजेश यादवलाई साउन १८ गते बिहान अज्ञात पक्षले गोली प्रहार गरी हत्या गरेको जिल्ला प्रहरी कार्यालयले जनाएको छ । यादवको शव जनकनन्दनी गाउँपालिका इनर्वा स्थित रेल्वे स्टेशन छेउमा साउन १८ गते बिहान फेला परेको हो ।

रेल्वे लिकको छेउमा यादवको शव देखेपछि स्थानीयले प्रहरीलाई खबर गरेको थियो । शवको जनकपुर अञ्चल अस्पतालमा पोष्टर्माटमको लागि राखिएको प्रहरीले जनाएको छ ।

यादवको शरीरमा ३-४ राउण्ड गोली प्रहार गरिएको जिल्ला प्रहरी कार्यालय धनुषाले जनाएको छ । यादवको टाउको र पेटमा गोली लागेको छ ।

घटना स्थलबाट कटुवा पेस्तोल एक थान, तीन थान गोलीको खोका र एउटा मोटरसाइकल फेला परेको जिल्ला प्रहरी कार्यालय धनुषाका एसपी गोविन्द थपलियाले बताए ।

यादव भारतमा बस्दै आएका थिए । साउन १८ गते बिहान नेपाल आएका थिए । घटना कसले र किन गराएको हो ? अनुसन्धान भइरहेको एसपी थपलियाले जनाकारी दिए ।


विनोदकुमार रविदास