अज्ञात पक्षबाट स्वास्थ्यकर्मीको हत्या गरेको पीडित पक्षको आरोप

  ०७८ असार ६ गते

परशुराम नगरपालिका–८ जमारानी आधारभूत स्वास्थ्य ईकाइ केन्द्र, जमरानीमा कार्यरत कर्मचारी २६ वर्षीया अस्मिता धामीको अज्ञात पक्षबाट हत्या गरिएको पीडित पक्षको आरोप छ ।

असार २ गते आधारभूत स्वास्थ्य इकाई केन्द्र, जमरानीबाट कोभिडको बचत खोप र स्वास्थ्य सामग्री लिएर जोगबुडा अस्पताल पुृ‌‌‍‍र्‍याउन निस्केकी अस्मिताको शरीरभरी निलडाम रहेका, नाकको डाडी पुरै भाचिएको र एकापट्टीको बाङ्गरा भाँचिएको अवस्थामा असार ५ गते शव फेला पारेकोले हत्याको आशङ्का गरिएको परशुराम नगरपालिका–८ का अध्यक्ष गोविन्द बोहराले बताउनु भयो ।

अस्मिता दिनहुँ घरबाटै कार्यालय आउने भएपनि कोभिडको खोप लगाउने अभियानका कारण एक दिन कार्यालय नजिकैको आफन्तको घरमा बस्ने र दोस्रो दिन छोरीका लागि भएपनि घर पुग्ने गर्थिन् ।

सधै दोस्रो दिन घर पुग्ने अस्मिता कार्यालयबाट दोस्रो दिनपनि घर नपुगेपछि घरपरिवारले आसर ३ र ४ गते जोगबुडा अस्पताल र आफन्तहरुकोमा खोजी गरेपनि अस्मिताको कुनै पत्तो नलागेपछि असार ५ गते प्रहरीलाई जोखतलास गरि दिन अनुरोध गरेका थिए ।

सिमा चौकी, तातापानी र जोगबुडा ईलाका प्रहरी कार्यालयको टोलीले खोजी गर्ने क्रममा असार ५ गते परशुराम नगरपालिका–९ स्थित हट्वानी सामुदायिक वनमा अस्मिताको शव फेला परेको जिल्ला प्रहरी कार्यालय, डडेल्धुराका डिएसपी महेन्द्र नेपालले बताउनु भयो ।

जिल्ला प्रहरी कार्यालय, डडेल्धुराबाट इन्स्पेक्टर हर्षबहादुर चन्द नेतृत्वको टोलीले असार ५ गतेदेखि नै घटनाको अनुसन्धान गरिरहेको र थप अनुसन्धानका लागि संघीय प्रहरी इकाई कार्यालय र प्रदेश प्रहरी कार्यालयबाट छुट्टा छुट्टै टोली असार ६ गते घटनास्थल पठाइएको सुदूरपश्चिम प्रदेश प्रहरी कार्यालयका एसपी योगेन्द्र थापाले बताउनु भयो ।

शवको पोष्टमार्टम असार ६ गते जोगवुडा अस्पतालमा गरिएको छ ।


भूपेन्द्र बिष्ट