समाचारहरू

थाहा नगरपालिका-५ को कार्यालयमा अज्ञात पक्षले असोज २६ गते राति आगजनी गरेको छ ।

आरनडाँडामा रहेको वडा कार्यालयमा असोज २६ गते राति करिब १२ बजेतिर आगजनी भएको वडा अध्यक्ष विष्णुबहादुर गुरुङले जानकारी दिए ।

आगजनी पश्चात् कार्यालयको मिटर बक्स पड्केको आवाज सुनेर गाउँलेले खबर गरेको वडा अध्यक्ष गुरुङले बताए ।

अध्यक्ष गुरुङले भने–‘आएर हेर्दा ढोका फुटाएर,  पेट्रोल,  मट्टितेल छर्केर आगो लगाएको पाइयो ।'

आगजनीले वडा कार्यालयमा रहेका सबै कागजपत्र तथा फर्निचर जलेर नष्ट भएको इलाका प्रहरी कार्यालय पालुङले जनाएको छ ।

घटनाको अनुसन्धान भइरहेको इलाका प्रहरी कार्यालय पालुङका इन्स्पेक्टर लोकबहादुर गुरुङले बताए ।

घटनामा संलग्न रहेको आशङ्कामा पाँच जनालाई गिरफ्तार गरिएको प्रहरीले जनाएको छ । आगजनी घटनाको कुनै पनि समूह तथा व्यक्तिले जिम्मा लिएको छैन । उक्त वडा कार्यालय यसवर्ष मात्र बनाइएको हो ।

पुष्पराज अधिकारी