समाचारहरू

कोशी गाउँपालिका–२ का १६ वर्षीय बालक रञ्जीतकुमार यादवको अज्ञात पक्षले पुस १९ गते हत्या गरेको प्रहरीले जनाएको छ ।

कोशी गाउँपालिका–२ पश्चिम कुशाहाका ४३ वर्षीय देवराम यादवका १६ वर्षीय छोरा रञ्जीत पुस १९ गते दिउँसोदेखि हराएको र पुस २० गते बालकको लास आधा गाडिएको अवस्थामा फेला परेको जिल्ला प्रहरी कार्यालयका डिएसपी राजकुमार राईले बताउनु भयो ।

पुस १९ गते दिउँसो छोरा घरबाट लौकही गएको र त्यसपछि घर नफर्किएपछि खोजी गर्दा पुस २० गते कोशी गाउँपालिका–२ स्थित कोशी माध्यमिक विद्यालय नजिक छोराको लास फेला परेको बाबु देवराम यादवले बताउनु भयो ।

शरीरभरी चोट र घाँटीमा बटारिएको डाम भेटिएकाले हत्या गरेर फालेको डिएसपी राईले बताउनु भयो ।

शवको पोष्टमार्टम वीपी कोइराला स्वास्थ्य विज्ञान प्रतिष्ठान धरान घोपामा पुस २० गते गरिएको छ ।

पीडित पक्षले पुस २० गते शव बुझी कोशी गाउँपालिका–१ मरिया खोलामा सद्गत गरेको मृत्तक बालकका बाबु देवराम यादवले बताउनु भएको छ ।

प्रहरीले घटनाका विषयमा अनुसन्धान थालेको छ ।

जयकृष्ण यादव