अज्ञात पक्षद्वारा पत्रकारमाथि कुटपिट

  ०७९ जेठ ३ गते

रेडियो राष्ट्रियमा कार्यरत सञ्चारकर्मी तथा पत्रकार कैलाश जोशीलाई जेठ २ गते राति अज्ञात पक्षले आक्रमण गरी कुटपिट गरेका छन् ।

भीमदत्त नगरपालिकाको मतगणनास्थलबाट फर्किएर ऐठपुरस्थित साइकल स्टोरमा पुग्दा सदरमुकामस्थित मुनसाइन होटलबाट निस्किएका अज्ञात युवाहरुको समुहले कारको ढोकामा हिर्काएपछि किन हिर्काएको भनेर भन्दा आक्रमण गरी कुटपिट गरेको पीडित पत्रकार जोशीले इन्सेक प्रतिनिधिसँगको फोन सम्पर्कमा बताउनु भयो ।

अज्ञात पक्षको कुटपिटबाट मुख र अनुहारभरी निलडाप परेको र आफूलाई बचाउन आएका स्थानीयहरुलाई समेत अज्ञात युवाहरुको समुहले हातपात गरेको पीडित जोशीले बताउनु भयो ।

कुटपिटबाट घाइते भएका पत्रकार जोशीको महाकाली अस्पतालमा उपचार भएको छ ।

पीडित पत्रकार जोशीले वडा प्रहरी कार्यालयमा जेठ ३ गते उजुरी दिएपछि घटनामा संलग्न पक्ष मध्ये भिमदत्त नगरपालिका–६ का २५ वर्षीय राजेश चन्दलाई गिरफ्तार गरी अनुसन्धान भइरहेको र फरार रहेका अन्य व्यक्तिहरुको खोजी कार्य भइरहेको वडा प्रहरी कार्यालयका इन्स्पेक्टर प्रकाश भण्डारीले बताउनु भयो ।

कुटपिटबाट घाइते हुनु भएका पत्रकार जोशी नेपाल पत्रकार महासंघ, कञ्चनपुरका साधारण सदस्य पनि रहनु भएको छ ।


लिली कुँवर