समाचारहरू

लामो खडेरीका कारण गएको आर्थिक वर्षको अन्नबाली उत्पादनमा कमी आएपछि अछाम जिल्लामा १५ हजार भन्दा बढी प्रशोधित खाद्यन्न अभाव रहेको र यसवर्षअघिल्लो आर्थिक वर्ष०७२/७३ भन्दा दोब्बर खाद्यन्न अभाव देखिएको जिल्ला कृषि विकास कार्यालय, अछामले जनाएको छ ।

खाद्यन्नको अभावसँगै अन्य जिल्लाबाट खाद्यन्न ढुवानी हुन नसक्दा आर्थिकस्तर कमजोर र पहुँच नपुग्ने परिवार भोकमारीमा पर्ने कार्यालयको बुझाइ छ । समयमै अछाममा यस वर्षखाद्यन्न ढुवानी हुन नसकेमा दिनभरी ज्याला, मजदुरी गरेर बेलुकी खाद्यन्न किनेर खाने परिवारलाई सबैभन्दा बढी मार पर्ने मङ्गलसेनका नरेश शाहीले बताए ।

जिल्लामा गएको आर्थिक वर्षमा धान पछिको गहुँ उत्पादनमा मात्रै ३० प्रतिशतले कमी आएको कार्यालयका वरिष्ठ अधिकृत कृष्णहरी देवकोटाले जानकारी दिए । उनका अनुसार समयमै अन्य जिल्लाबाट खाद्यन्न ढुवानी भएर नागरिकले उपभोग गर्न पाउनु पर्छ ।

अछामको २ लाख ७५ हजार भन्दा बढी जनसङ्ख्यालाई वार्षिक रूपमा करिव ६० हजार मेट्रिकटन प्रशोधित खाद्यन्न आवश्यक रहेको कार्यालयले जानकारी दियो ।

जिल्लामा उत्पादन भएको, खाद्य संस्थान र व्यापारीहरूमा करिव ४५ मेटि्रकटन खाद्यन्न रहेको कार्यालयले जनाएको छ ।

शिवराज ढुङ्गाना