अख्तियार प्रमुखविरुद्ध महाअभियोग प्रस्ताव

अख्तियार दुरुपयोग अनुसन्धान आयोगका प्रमुख आयुक्त लोकमानसिंह कार्कीविरुद्ध महाअभियोगको प्रस्ताव दर्ताको प्रक्रिया अघि बढाइएको छ ।

नेकपा (एमाले) र नेकपा (माओवादी केन्द्र) का १ सय ५७ जना सांसदले हस्ताक्षर गरी कात्तिक ३ गते प्रमुख आयुक्त कार्कीविरुद्ध व्यवस्थापिका–संसद् सचिवालयलाई महाअभियोग प्रस्ताव बुझाएको नेकपा एमालेका प्रमुख सचेतक भानुभक्त ढकालले जानकारी दिएका छन् ।

संवैधानिक प्रावधानअनुसार महाअभियोग दर्ताका लागि आवश्यक पर्ने कम्तीमा एक चौथाई सांसदको सङ्ख्या पुर्याएर प्रस्ताव अघि बढाइएको र अरु सांसदको हस्ताक्षर थपिने प्रमुख सचेतक ढकालले बताए ।

संसद्बाट कात्तिक ३ गते मात्रै महाअभियोग प्रस्ताव सिफारिस समिति गठन भएको थियो । महाअभियोग प्रस्तावका सन्दर्भमा थप प्रक्रिया कात्तिक ४ गते अघि बढाइने बताइएको छ ।

 


अनलाइन डेस्क