फिचरहरू

नारायण सुवेदी

१३ भाद्र ०६२

बर्दियाको गणेशपुर गाउँमा सुरक्षाकर्मी र माओवादीबीच दोहोरो भिडन्त भएको छ महिना बितिसक्दा पनि भिडन्तमा गोली लागी घाइते भएका चारजना बालबालिका र मारिएका चारजनासहित १२ जना सर्वसाधारणको परिवारले अझैसम्म क्षतिपूर्ति पाएका छैनन्।

माओवादीले बाटोमा गरेको अवरोध खुलाउन सदरमुकाम गुलरियाबाट गएको सुरक्षाकर्मीको संयुक्त टोली र माओवादीबीच ०६१ फागनु १७ गते, दिउँसो ४.०० बजे देखि साँझ ७.०० बजेसम्म दोहोरो भिडन्त भएको थियो । भिडन्तका क्रममा गोली लागी चारजना बालबालिका घाइते भएका थिए । उक्त भिडन्तमा गोली लागी चारजना सर्वसाधारणको मृत्यु भएको थियो भने अन्य चारजना घाइते भएका थिए । घाइते तथा मृतक कसैका परिवारले पनि हालसम्म क्षतिपूर्ति पाएका छैनन् ।

उक्त भिडन्तका क्रममा महम्मदपुर गाविस-४, डल्लाका आठ वर्षीय विजयराज यादवको पिसाब गर्ने ठाउँमा गोली लागेको थियो । त्यस्तै, १० वर्षीया रेखा यादवको पिठ्यूँमा दुईओटा गोली र १० वर्षीया जानुन्ती यादवलाई घाँटीमा गोली लागी घाइते भएका थिए। घाइतेहरूको उपचार नेपालगञ्जस्थित भेरी अञ्चल अस्पतालमा गरिएको थियो । घाइते विजयराजका बाबु मनिराम यादव भन्छन्, "क्षतिपूर्तिका लागि जिल्ला प्रशासन कार्यालयमा घटनाको दुई/तीन दिनपछि निवेदनको बारेमा बुझन जाँदा जहिले पनि 'माथिबाट आदेश आएको छैन, आएपछि हामी आफै खबर गर्र्छौं' भन्छन् ।"

महम्मदपुर गाविस-४, गणेशपुर डल्ला गाउँकी १६ वर्षीया सावित्री खटिकका बाबु मालती खटिकका अनुसार घटना भएको दुई दिनपछि क्षतिपूर्तिका लागि जिल्ला प्रशासन कार्यालयमा निवेदन दिएको भए तापनि कुनै सुनुवाइ भएको छैन । सावित्री बारीमा साग टिप्न लागेको समयमा घाइते भएकी थिइन । उपचारको क्रममा सावित्रीलाई नेपालगञ्ज भेरी अस्पताल लगिएकोमा डाक्टरले लखनउ लैजानु पर्ने सल्लाह दिएका थिए । सावित्रीलाई भेरी अस्पतालमा राख्दासम्मको औषधी खर्च बाँके जिल्ला प्रशासनले व्योहोरेको भए तापनि लखनउमा भएको उपचार खर्चमा कसैले सहयोग नगरेको बताइएको छ । आर्थिक स्थिति कमजोर भएका कारण गाउँमा ऋण सापट गरी उपचार गराउनु परेको र अझै पनि सावित्रीलाई बेला बेलामा लखनउ लैजानु पर्ने बुझिएको छ । लखनउमा उपचार गर्दा लगभग ७० हजार रु. खर्च भइसकेको दुखेसो व्यक्त गर्दै छोरीको उपचारको लागि सहयोग गरिदिन सरकार र अन्य मानवअधिकार संघ-संस्थासँग उनले अनुरोध गरेका छन् ।

सोही घटनामा गोली लागी घाइते हुन पुगेका महम्मदपुर गाविस-४ का ४५ वर्षीय मायावती यादव, ५० वर्षीय केतकी यादव, सोही गाविस दुध्धाका रामप्रसाद थारु तथा छेदन लोधले पनि क्षतिपूर्ति पाएका छैनन् । सो भिडन्तमा गोली लागी मृत्यु भएका कालिका गाविस-६ का भूपू अर्सइ नरबहादुर जि.सी., महम्मदपुर गाविस-६ का ३४ वर्षीय अब्दुल गफार तेली, सोरहवा गाविस-६ का २१ वर्षीय लाले खटिक र महम्मदपुर-१ का ५० वर्षीय चौरसिया यादव (उपचार गर्दा गर्दै मृत्यु भएको ) का परिवारजनले समेत क्षतिपूर्ति पाएका छैनन् ।

-