अत्याधिक गर्मीका कारण अस्पतालमा बिरामीको चाप बढ्दै (फोटो फिचर)

रुपन्देही । ०८१ वैशाख २७ गते

अत्याधिक गर्मी बढेपछि लुम्बिनी प्रादेशिक अस्पताल, बुटवलमा बिरामीहरूको चाप बढेर अस्पतालका वेड भरिभराउ भएका छन् । अत्याधिक गर्मीका कारण भाइरल ज्वरो, टाइफाइड, झाडा पखाला वान्ता, बेहोस हुने लगायतका बिरामी बढ्न थालेका हुन् ।

लुम्बिनी प्रादेशिक अस्पताल, बुटवलका वरिष्ठ फिजिसियन डाक्टर नन्दु पाठकका अनुसार मौसममा आएको परिवर्तनसँगै अस्पतालमा रुघा, खोकी, ज्वरो, झाडा पखाला, बेहोस र श्वासप्रश्वास लगायतका बिरामीको सङ्ख्या बढ्दै गएका छन् । केही दिनयता चलेको तातो सुख्खा हावा र अत्याधिक गर्मी बढ्दै गएपछि सहरी क्षेत्र तथा ग्रामीण बस्तीमा भाइरल ज्वरो, रुघा, खोकी, झाडा पखाला, बान्ता हुने, बेहोस हुने र श्वासप्रश्वासका बिरामी बढेको उहाँले बताउनु भयो । डा.पाठकका अनुसार दुई सातादेखि बिरामीको चाप बढ्न थालेपछि लुम्बिनी प्रादेशिक अस्पतालमा दैनिक १ हजार ५ सयदेखि २ हजारसम्मको हाराहारीमा बिरामीहरू उपचारका लागि आउने गर्छन् ।

मौसममा आएको परिवर्तनसँगै बिरामीको चाप बढ्दै गएपछि अस्पतालमा आउने बिरामीको चाप व्यवस्थापन गर्न कठिन हुने स्थित आउन थालेको छ । अन्य समयको तुलनामा यो समयमा बिरामीको चाप सामान्य बढ्ने भए पनि अहिले सङ्ख्यात्मक रूपमा बढेकाले एउटै वेडमा दुई/तीन जना बिरामीलाई राखेर उपचार गरिरहेको डा. पाठकले बताउनु भयो ।

लामो समयसम्म वर्षा नहुँदा र सुख्खा तातो हावा चल्ने र अत्यधिक गर्मी बढेका कारण विभिन्न किसिमका बिरामीको चाप बढेको छ । नियमित अस्पताल आउने बाहेक अहिले भाइरल ज्वरो, टाइफाइड, बेहोस हुने झाडापखाला बान्ता हुने लगायतका बिरामीहरू बढी मात्रामा छन् । उनीहरूलाई लक्षित गर्दै अस्पतालले नियमित जाँचका लागि आउने बिरामीको व्यवस्थापनमा विशेष ध्यान दिएको छ । उपचारमा आउनेमा बहिरङ्ग सेवामा आउने बिरामीको सङ्ख्या बढ्दो क्रममा छ ।

आकस्मिक कक्षमा बिरामी राख्ने ठाउँ नहुँदा एउटै वेडमा तीन जनासम्म राखेर उपचार गर्नुपरेको छ । ज्वरो, झाडापखाला, दम, प्रेसर, सुगर, मुटु र मृगौला रोगका बिरामीको सङ्ख्या धेरै भएको डा.पाठकले बताउनु भयो । बिरामीको सङ्ख्या बढेको र जनशक्ति अभाव भएपछि आकस्मिक कक्षमै उपचार सहज नभएको स्थानीयले गुनासो गरेका छन् । सुनसरीको धरान उपमहानगरपालिका–१३ का घनश्याम तिम्सिनाले प्रतिष्ठानमा भाइको उपचार गर्न नसकेपछि अन्यत्र लैजानुपरेको गुनासो गर्नुभयो । उहाँले भन्नुभयो, ‘ठूलो अस्पताल भनेर उपचार गर्न जान्छौँ तर आकस्मिक कक्षका चिकित्सकले रगत परीक्षणका लागि बाहिरका क्लिनिकमा पठाउने गर्छन्, न त समयमै उपचार पाइन्छ ।'

लुम्बिनी प्रादेशिक अस्पताल, बुटवलका सूचना अधिकारी वरिष्ठ बालरोग विशेषज्ञ डाक्टर नेत्र रानाका अनुसार तुलनात्मक रूपमा अहिले बिरामीहरूको सङ्ख्या बढेको बताउनु भयो । डा.राना भन्नुहुन्छ, गत पुसदेखिको वैशाख २५ गतेसम्मको तथ्याङ्क हेर्ने हो भने अस्पतालको बहिरङ्ग सेवामा उपचारका लागि आउने बिरामीको चाप बढ्दो क्रममा रहेको छ । पुस महिनामा २७ हजार ५ सय ८२ जना, माघमा २६ हजार ६५ जना, फागुनमा ३० हजार ९९ जना, चैतमा ३१ हजार ४ सय ७२ जना र वैशाख २५ गतेसम्म २४ हजार ६ सय ६६ जना बिरामीले सेवा लिएको अस्पतालको तथ्याङ्कमा उल्लेख छ ।

लुम्बिनी प्रादेशिक अस्पताल यस क्षेत्रकै उत्कृष्ट अस्पताल हो । यस अस्पतालमा रुपन्देही, नवलपरासी, गुल्मी, अर्घाखाँची, प्यूठान, पाल्पा, कपिलवस्तु, दाङ, स्याङ्जा लगायतका जिल्लाहरूबाट उपचारका लागि बिरामीहरू आउने गर्छन् । अहिले जिल्लाको तापक्रम ४० डिग्री हाराहारीमा रहेको छ । डा. पाठकले सर्वसाधारणलाई सफा उमालेको पानी प्रशस्त पिउन, नियमित झोलिलो पदार्थ सेवन गर्न, धुम्रपान र मद्यपान नगर्न, फलफुल र हरियो साग सब्जी खान, काँचो खानेकुरा नखान, दिउँसोको चर्को घाममा घर बाहिर ननिस्कन सबैलाई आग्रह गर्नुभएको छ ।

Photo09052024Rupandehi12

Photo09052024Rupandehi11

Photo09052024Rupandehi10

Photo09052024Rupandehi9

Photo09052024Rupandehi8

Photo09052024Rupandehi7

Photo09052024Rupandehi6

Photo09052024Rupandehi5

Photo09052024Rupandehi4

Photo09052024Rupandehi3

Photo09052024Rupandehi2

Photo09052024Rupandehi1

Photo09052024Rupandehi

- रीमा बिसी