सम्पादकीयहरू

आजबाट इन्सेकअनलाइन २१ वर्षमा प्रवेश गरेको छ । डिजिटल माध्यमबाट मानव अधिकार अवस्थाको समाचार, विचार र सूचना प्रदान गर्ने लक्ष्यका साथ हाम्रो यात्रा निरन्तर अगाडि बढिरहेको छ । अनौपचारिक क्षेत्र सेवा केन्द्र (इन्सेक) ले संस्थापक महासचिव स्व. प्रकाश काफ्लेको स्मृति दिवसको अवसर पारेर २०६१ साल साउन १६ गते इन्सेक अनलाइनको सुरुआत गरेको थियो । मानव अधिकार समाचार तथा सरोकारलाई पाठकमाझ प्रस्तुत गर्ने र त्यसमार्फत अधिकार चेतना अभिबृद्धि गर्ने तथा राज्यका निकायहरुको जबाफदेहितालाई जिम्मेवार बनाउने उद्धेश्यमा इन्सेक अनलाइन अविचलित यात्रामा छ । मानव अधिकारसँग सम्बन्धित समाचार मात्र प्रकाशन गर्ने डिजिटल माध्यमले इन्सेकको अभियानमा २१ वर्षको यात्रा पूरा गरेको यस क्षणमा हामी हाम्रा समस्त पाठकहरूमा आभार व्यक्त गर्दछौँ ।

इन्सेक अनलाइनका प्रतिनिधि देशका ७७ जिल्लामा क्रियाशील छन् । उनीहरूले आआफ्नो जिल्लामा भएका मानव अधिकार उल्लङ्घन तथा ज्यादतीका घटनाको जानकारी र मानव अधिकारका विविध विषयका समाचारको तथ्य पुष्टि एवम् पुनःपुष्टि गरी सम्बन्धित प्रदेश कार्यालयमा पठाउँछन् भने हाम्रा सातै प्रदेशमा रहेका प्रदेश कार्यालयहरूले सम्पादनसहित समाचारहरू प्रकाशन गर्छन् ।

मानव अधिकारका विविध विषयका समाचार, लेख रचना, समसामयिक विषयमा विभिन्न विधाका विज्ञसँग लिइएको अन्तरवार्ताहरू, फिचर, विज्ञप्ति, तथ्य सङ्कलन प्रतिवेदनहरू र इन्सेकको नियमित प्रकाशन प्राची सचेतना त्रैमासिक तथा नेपाल मानव अधिकार वर्ष पुस्तक लगायतका सामग्री इन्सेकअनलाइनमा पाउन सकिन्छ । यी सामग्रीबाट मानव अधिकारका विषयमा चासो राख्ने हाम्रा पाठकहरुले एकै ठाउँबाट धेरै सूचना प्राप्त गर्न सक्नु हुनेछ भन्ने विश्वास हामीले लिएका छौँ ।

मानव अधिकार अवस्थाको चित्रण गरिने यस अनलाइनमा प्रकाशन गरिने र गरिएका विषय आधिकारिक तथा तथ्यमा आधारित होउन् भन्ने कुरालाई ध्यान दिइन्छ । त्यसैले इन्सेक अनलाइनमा समाचारलाई ब्रेक गर्नेभन्दा अनुगमन तथा तथ्यको विस्तृत विवरणलाई प्राथमिकतामा राखिन्छ । हामीले प्रकाशन गरेका सामग्रीहरूका बारेमा प्रबुद्ध पाठक वर्गबाट रचनात्मक सुझाव तथा सल्लाहको अपेक्षा गर्दछौँ । यहाँहरुबाट प्राप्त हुने सुझाव तथा सल्लाहले हामीलाई परिष्कृत हुन मद्दत पुग्नेछ ।

यसबिचमा राजनीतिक तथा सामाजिक आन्दोलनमा थुप्रै आरोहअवरोह आए । इन्सेक अनलाइन त्यसको साक्षीमात्र रहेन,  यसले तिनीहरुको दस्तावेजीकरणसमेत गरेको छ । मानव अधिकारको उपभोग गर्नबाट वञ्चित नागरिकहरुको पहुँच स्थापना गर्न इन्सेक अनलाइनले भूमिका निर्वाह गरेको छ । समग्रमा भन्नु पर्दा २० वर्षको यात्रामा इन्सेक अनलाइनले न्याय र समानताका लागि एक जिम्मेवार अनलाइनले खेल्नु पर्ने भूमिका निर्वाह गरेको छ ।

हामीलाई यात्राको २१ औँ वर्षसम्म निरन्तर अगाडि बढ्न साथ र सहयोग गर्नु हुने हाम्रा प्रतिनिधि, प्रदेश डेस्क, केन्द्रीय डेस्कका सहकर्मी, शुभचिन्तक, सहयोगीलगायत समस्त पाठकहरुमा शुभकामना व्यक्त गर्दछौँ ।