इन्सेक गतिविधिहरू

अनौपचारिक क्षेत्र सेवा केन्द्र ( इन्सेक) प्रदेश १ कार्यालय विराटनगरको आयोजनामा भोक्राहा नरसिंह गाउँपालिकामा स्वास्थ्य अधिकार सम्बन्धी सरोकारवालाबीच अन्तरक्रिया कार्यक्रम कात्तिक २१ गते सम्पन्न भएको छ ।

इन्सेकले सञ्चालन गरीरहेको मानव अधिकार संरक्षण र सम्वर्द्धनको लागि राज्यको जवाफदेहिता तथा जनताको सहभागिता अभिवृद्धि कार्यक्रममा अन्तरक्रिया कार्यक्रम सम्पन्न गरिएको हो ।

सो अन्तरक्रियामा गाउँपालिकाले आर्थिक वर्ष ०७७।०७८ को नीति तथा कार्यक्रम र गत आर्थिक वर्षमा सम्पन्न भएका क्रियाकलापहरू बारे जानकारी गराएको थियो ।

भोक्राहा नरसिंह गाउँपालिकाका उपाध्यक्ष पुनम कुमारी मेहताले स्वास्थ्यका लागि गाउँपालिकाले श्रोत साधनले भ्याएसम्म आम सर्वसाधारणलाई स्वास्थ्य अधिकार दिलाएको बताउनु भयो । उहाँले मानव अधिकार र स्वास्थ्य अधिकार नागरिकको मौलिक हक भएकाले त्यसको कार्यन्वयन गर्न लागि परेको बताउनुभयो ।

गाउँपालिकामा नागरिकको स्वास्थ्य अधिकारलाई सम्बोधन गर्न आठ ओटा वडामा स्वास्थ्य संस्था सञ्चालनमा ल्याएको, सबै वडाका नागरिकले स्वास्थ्य सेवामा पहुँच राख्न सकेको बताउनु भयो ।

अन्तरक्रियामा नेपाली कांग्रेसका प्रतिनिधि युवराज दाहालले स्वास्थ्य सेवालाई सुलभ र प्रभावकारी बनाउन गाउँपालिकाले बजेट बिनियोजन गर्नुपर्नेमा जोड दिनुभयो । उहाँले स्वास्थ्य संस्थाका कर्मचारीहरूले जिम्मेवारी पूर्ण रूपमा बहन गर्नुपर्ने सुझाव दिनुभयो ।

कार्यक्रममा स्वास्थ्य शाखा प्रमुख आमल अन्सारीले स्वास्थ्य संस्थामा माग अनुसारको औषधी नभएपनि अहिलेको अवस्थामा आठ ओटै वडामा औषधि अभाव नरहेको बताउनुभयो ।

आलमले आठ ओटै वडामा स्वास्थ्य संस्था तथा स्वास्थ्य चौकी स्थापना रहेको र गाउँपालिकाले तय गरेको नीति र स्वास्थ कार्यक्रम तथा बजेट बिनियोजन सम्बन्धी जानकारी गराउनुभयो ।

जयकृष्ण यादव