सरोकारवाला र सेवा प्रदायक निकायबीच अन्तरक्रिया सम्पन्न

  ०७५ चैत २५ गते

इन्सेक, कर्णाली प्रदेश कार्यालय, सुर्खेतको आयोजनामा स्थानीय निकाय सरोकारवाला र सेवा प्रदायक निकायहरूबीच चैत २५ गते वीरेन्द्रनगरमा अन्तरकृया सम्पन्न भएको छ । कार्यक्रममा वीरेन्द्रनगर नपा स्वास्थ्य इकाइ संयोजक उदयबहादुर थापाले आफू स्वास्थ क्षेत्रमा कार्यरत रहेको भए पनि स्वास्थ बीमाको कार्यक्रम प्रभावकारी हुन नसकेको गुनासो गरे । कृषि सहकारी संघका मोतीराम शर्माले कृषकलाई चाहिएको समयमा मल र बीउ नआउने समस्याको हल सरोकारवालाले चाँडै गर्नुपर्ने बताए ।

सेवाग्राहीका भनाइलाई सम्बोधन गर्दै कर्णाली प्रदेश अस्पतालका अध्यक्ष श्यामलाल कँडेलले प्रदेश अस्पताललाई स्तरीय बनाउने कार्यमा आफू प्रयासरत् रहेको बताए । नगरपालिकाका पशु इकाइ संयोजक नारायण प्रसाद न्यौपानेले नगरभित्रको बधशाला र पशु बिमाको कार्यक्रम अहिले प्राथमिकतामा रहेको बताए । पशुमैत्री गोठ बनाउनका लागि बजेट बढाउनुपर्ने न्यौपानेको भनाइ थियो । कार्यक्रम मानवअधिकार निगरानी समूहकी अध्यक्ष लक्ष्मी शर्माको अध्यक्षतामा सम्पन्न भएको थियो ।

इन्सेक कर्णाली प्रदेश कार्यालय, सुर्खेत