इन्सेक गतिविधिहरू

जिल्ला जनस्वास्थ्य कार्यालय सुर्खेतका प्रमुख शम्भु ज्ञावलीले वर्षायाममा लाग्ने सबैप्रकारका रोगका औषधिहरू गुर्भाकोट नगरपालिकासहित निल्लाका सबै गाउँ तथा नगरपालिकाहरूमा उपलब्ध गराउने प्रतिबद्धता जनाएका छन् ।

इन्सेकद्वारा गठित गुर्भाकोट नपा ४, ५ र ९ वडा स्तरीय मानव अधिकार निगरानी समूहले असार ४ गते बुझाएको ज्ञापनपत्र ग्रहण गर्दै जनस्वास्थ्य प्रमुख ज्ञावलीले यस्तो प्रतिबद्धता जनाएका हुन् ।

प्रमुख ज्ञावलीले परिवर्तित संरचना अनुरूप स्थानीय तहबाट समाधान गरिने समस्याहरूको हकमा स्थानीय तहबाटै र जिल्ला जनस्वास्थ्यद्वारा समाधान गर्न सकिने समस्याहरूको हकमा समाधान गर्न आफू लागिपर्ने प्रतिबद्धतासमेत जनाएका छन् ।

आगामी आर्थिक वर्षमा समावेश गरी स्टेचर उपलब्ध गाराउने, महिलाको पाठेघर खस्ने समस्यालाई समाधानका लागि शिविर सञ्चालन गर्ने तथा राज्यद्वारा निशुल्क घोषणा गरिएका क्यान्सर, मृगौला र मुटुरोगको अपे्रशनलगायतका रोगहरूको निशुल्क उपचारको सिफारिसको लागि सहज प्रक्रियामा कमी नहुने प्रमुख ज्ञावलीको भनाइ थियो ।

गुर्भाकोट नपा ४ का वडाध्यक्ष प्रसन्न शाह, ५ का वडाध्यक्ष लालबहादुर पुन, ९ का वडाध्यक्ष शशि भट्टराई, सदस्य नन्दलाल घर्ती, स्वास्थ्यचौकी साहारेका प्रमुख किरण वली, माओवादी केन्द्रका मानबहादुर विटालु तथा मानव अधिकार निगरानी समूहका अध्यक्ष मोतिलाल बिक र सदस्य भीमकुमारी घर्ती सम्मिलित टोलीले बुझाएको ज्ञापनपत्रमा वर्षायाममा लाग्ने सबै प्रकारका रोगको औषधि तथा राज्यले निशुल्क घोषणा गरेको औषधिहरू समयमै उपलब्ध गराउनुपर्ने लगायतका १० बुँदे माग रहेका छन् ।

                                                                                                                                            दुर्गा थापा